Извршителот на најкрвавиот масакр во историјата на САД, во рок од неколку дена успева во својата хотелска соба да внесе 21 куфер со оружје, плус неколку торби. Њујорк тајмс прави видео од неговото движење и планирање, составувајќи снимки од безбедносните камери.

Убиени 59 луѓе, ранети и повредени речиси 530. Сите, жртви на 64-годишен Американец со автоматско оружје (17 парчиња), хотелска соба на 32-ри спрат и за сега без јасен мотив - зошто? Вака изгледаа дел од денешните американски весници.

Во времето кога полицијата на Лас Вегас ги вадеше последните бројки за жртвите, од преку пола свет стигна соопштение од ИСИС дека извршител на масакрот е „војник на Исламската држава“. Ваквото на ништо базирано тврдење беше надополнето со второ соопштение во кое се појаснува дека убиецот наводно пред неколку месеци преминал во Ислам.