Освен во крајпуташките балкански крчми каде што сè уште жилаво се држи, хармониката е во дефанзива уште од раните 60-ти години на минатиот век, кога ја убија Битлси и слични дрогераши со гитари. Но, во последно време повторно станува кул, а влегува и во рокенрол халата на славните.  

Мала пакосна одмазда за сите оние анонимни жртви кои во животот некогаш имале комшии убедени дека нивното најмило има особен талент за музика па му купиле инструмент., обично од најгласните. "Го гледам, одма ја фаќа мелодијата" гласи најчестата објективна рецензија на амбициозниот родител кој со мелодија обично се среќава само на слави и други веселби. Е па, купи му кавал и нека вежба во планина.

Во пресрет на акцијата за правење елка од пластични шишиња во Градскиот парк, погледнете го трејлерот за Landfill Harmonic, трогателен филм за еден специјален оркестар од Јужна Америка, целосно составен од инструменти направени од - ѓубре.