Рамбо има нова генијална идеја: да носиш со себе ротационо светло па да си го ставаш на глава кога сакаш келнер да те види. На најавената „свирка без прегласно озвучување“ и „вечера на гломазна поезија“, Рамбо меѓу другото нуди и „инает карта“. Тоа е ако ти се оди на концерт ама нејќеш да одиш, за инает. А има и дупла инает карта.

Помладата ѝ се доверува на поискусната дека сака да ги среди работите сама со себе и ѝ се пожалува дека притоа наидува на емотивна блокада во себе. За да претпоставите за каква поточно „емотивна блокада“ се работи, треба да знаете дека се работи за учеснички во српското реално шоу „Задруга“.  

Васко Жабата да се тргне малку настрана, од Бугарија ни стигнува нов ушобол. И овој е Васко ама не е Жабата туку Далаверата. Со верна дружина Трамписти од европска Бугарија, Васко Далаверата ќе ни изведе нумера, сељачка, да посељачка не може да биде. Па другарот Трамп сам нека суди кои му се стратешки пријатели: досетливите велешани или овие?     

Дури и откако лично ќе одговори што дома готви Јосипа Лисац (особено лично), тоа прашање останува мистерија. Знаеме само дека не е сарма, и дека се нешта со многу „ш“. Чујте го вие тоа мјаукање нејзино.

Дечкото смислил ненадјебива одбрана од оние кои ничим изазвани ти се јавуваат по телефон, на пример, за да ти увалат нешто за купување. Штом досадата (официјално: агентот за продажба) зуцне и почне да ти дрнда за нивната понуда, ти почнуваш со песна! Функционира како подмачкано, репетирајте своја плејлиста. 

Муабетот е дека Албанија е земја со најмногу Мерцедеси по глава на жител. Дојче Веле праќа свој човек за да види што е работата. Добра репортажа.

Преработка на легендарната сцена кога Морфеус му отвора чакри на младиот Нео и му ја покажува стварната реалност на овој свет, наспроти илузиите во кои (мисли дека) живее. А на Нео му се има паднато да живее во делот на Матриксот наречен Бугарија.

Нежната „Јутрос ми је ружа процветала“ која пред 60 години ја испеа Милица Поповиќ е една од најпреработуваните српски песни (Мерима Његомир, Лепа Лукиќ, Лепа Брена...). Сакаме да ја слушнете како што прилега, со многу шишиња на астал. Само што, не се работи за српска кафана, туку за Холанѓаните Ештон брадерс. Ма хе ри. 

Дуци е урнебесен затоа што перфектно ги гаѓа стереотипните особености на ликовите кои ги гради (јазикот, темите, реакциите, нивниот поглед на свет, стандардните узречици...). Ова пак, е урнебесно од сосема обратна причина. Затоа што е погрешен ликот, тоест во телото на кралицата е ембедиран духот на балканска жена.

Бугарска телевизиска екипа начекува стар чичко кој случајно ја „издрпнал колата“, додека ја вадел „за да не оди никаде“, имал 1,8 промили алкохол “од една чаша вино“ и не е точно дека се зачукал во шест коли.  Важно е на проблемите да се гледа со насмевка.

При крајот на војната во Босна, Лајбах одржаа два концерта во Сараево, во објектот на Националниот театар, една од ретките згради во градот која не беше унаказена. Го прогласија Сараево за територија на Neue Slowenische Kunst, делеа пасоши и патем на домаќините им кажаа неколку збора за Европа.