Славонскиот беќарац (во суштина ерген, весељак, алкос) е музички израз на една хумористична рурална инфантилност, со ласцивни текстови полни со сексуални алузии. Како таков, заштитен е од УНЕСКО како нематеријално културно наследство. Ама, полицајка на должност слушнала еден безобразен стих и поднела пријава - се осеќала навредено и понижено.

Сава од Кикинда дошол до оној момент до кој дојде и Мајкл Даглас (како Вилијм Фостер) во легендарниот филм за пукање на филмот „Falling Down“. Но наместо да тргне во одмазнички поход и да фати да тамани душмани, Сава смислил генијален план. Откако ниедна служба не дошла да му помогне со поплавената бавча, напишал „проштално писмо“ дека се фрлил во септичката јама. А потоа се скрил на таван и гледл сеир. Победа!

Ако не за отворање, тогаш оваа џез химна треба секоја година да служи за затворање на Скопски џез фестивал, чисто заради меко транзитирање назад кон овоземните синкопи, битови и импровизации. Ако не сте убедени, песната се вика „Прасетина.“ 

Веројатно ви е позната нашата пасија за шкарт музика (ама онаа што е чудесно шкарт, обичниот шкарт го имате на Топ листи) па со вас се имаме радувано на безброј фасцинантни ликови од сивата зона. Дечково е еден од нив. Како да е несреќник излезен од онаа емисија „Проводаџија“. Некои ќе се пожалат што воз никогаш нема кога најмногу треба а најјакиот совет кој му е даден досега гласи: „Игнорирај ги позитивните коментари“.  Дарио и песната „Ова боли“. Точно.

Сцена од Благоевград од бучни протести против западниот Хеловин со намера да се вратат луѓето на „патриотскиот Хеловин“ кои го викаат Кукери и на кој, негде пред Нова година, со маски, костуми и клопотарци, се протеруваат лошите духови. Бонус предност: на Кукери не се главни колачите туку ракијата. 

Баба Љубица е фото робот за архетипска балканска жена од постарите модели. Домаќинка е, знае и сака да готви (на мрсно не штеди), ама е јако наивна па најјаките и најискрените работи ги кажува кога мисли дека не ја снимаат. Овде го сомничи внукот дека потпаднал под влијание на некоја секта а кога ќе ѝ кажат дека тој е филозоф, Љубица со полна емпатија ќе каже: Тешко њему!

Екипата на Иван Ивановиќ ѝ фаќа сеир на Маја Николиќ, српска пејачка, станарка на Фарми и други реални шоуа и од пред некое време јак верник. Маја решила да ја промовира книгата „Чудотворец“ за свети Нектариј Егински. А Маја кога објавува нешто на социјални мрежи, редовно користи филтер. Верски неутралниот филтер решил да го разубави и подмлади и Нектариј.