Маршот за интернет

По втор пат во три дена Унгарците излегоа на протест во Будимпешта против планот за воведување на првиот данок на интернет во светот. Вториов пат излегоа 100.000 луѓе.

 

Планот на унгарската влада е од 2015-та на интернет провајдерите да им воведе данок од 2,2 евра по интернет корисник (како физичко лице), и 16 евра за бизнис корисници. Оригинално предлогот беше 0,4 евра (24 денари) за гигабајт сообраќај, па го сменија од страв од реакции.

За Унгарците целта на данокот е преку парите да се отежни пристапот до информации, со што Орбан сака да создаде "дигитална железна завеса околу Унгарија."

За ЕУ ваквиот данок е глуп затоа што Унгарија и онака е под просекот во сите дигитални индикатори "а дигиталниот дел од економијата веројатно е главната работа што спречува Европа да се врати во рецесија."

Оправданието на владата е дека овој данок само го надополнува данокот на телефонски разговори бидејќи луѓето се повеќе го користат интернетот за телефонирање. Плус ова ќе земе само дел од и онака големиот профит на телеком операторите, а парите ќе се користат за подобрување на интернет пристапот во руралните средини.

30 октомври 2014 - 09:50