Во декември 1994 Русија, САД и Британија, седнаа, ветија и потпишаа дека ќе ја гарантираат безбедноста и територијалниот интегритет на Украина доколку државата го предаде својот нуклеарен арсенал (еден дел да се уништи, еден дел да се испрати во Русија). На денот на потпишувањето Украина има над 2.300 нуклеарни глави. Речиси 30 години подоцна Украина е минус 20% од својата територија.

Командантот во чија надлежност се американските нуклеарки, Чарлс Ричард, го расипа апетитот на присутните на една конференција на морнарицата, споделувајќи го впечатокот дека нему Украина му делува само како предјадење за главното јадење. Русија останува акутна закана но главниот непријател е Кина.

Во целиот хаос што се случува, Полска пробува некако да искамчи некое парче нуклеарно оружје од САД за да го има ако војната меѓу Русија и Украина тргне во не дај Боже правец.

Точно е дека цело време околу Путин (или кој и да е руски претседател) има нуклеарен куфер (Чегет), тоа што е неточно е дека во куферот има „црвено копче“ за лансирање на нуклеарките. Поинаку одат работите.