Управниот одбор на ФФМ, на денешната седница, донесе одлука за покренување дисциплинска постапка против поранешниот претседател на федерацијата, Муамед Сејдини. Најавува и ревизија на едукативниот процес за носителите на тренерски лиценци, меѓу кои ќе се испитува и ПРО лиценцата на Игор Ангеловски.

Самоволието на тоталниот анонимус кој од нигде никаде стана претседател на Фудбалската федерација на Македонија (ФФМ) продолжува. Овојпат од Тетово.

Чудна е релацијата репрезентација – федерација или поточно Ангеловски – Сејдини, а уште почудно е што ова се случува во време кога првиве под капа на вториве бележат историски резултати за македонскиот фудбал. Се фрлаат непотребни и несфатливи флеки во најубавиот период од постоењето на селекцијата.

Најголемиот успех во историјата на македонскиот репрезентативен фудбал со пласман на Евро 2020, некако го расипуваат шпекулациите околу новиот договор на човекот кој ја однесе Македонија на прв континентален собир.