Човеков што изгледа како да е само гостин на планетава, дојден тука да ни ги отвори видиците така цврсто закоравени во самобендисано едноумие околу спознавањето на светот и животот, ладно предвидува две епизоди од последната сезона на Black mirror неколку години пред тие воопшто да бидат снимани. Инаку претходно Карл имаше речиси идентична идеја со приказната за Бенџамин Батон.

Супермоќта што ќе ја поседува овој праведник е на луѓето во лице да им кажува дека "серат", и соодветно на ова тој ќе биде познат како - Булшитмен. Најдобриот дел од целата работа е што ликот, супермоќта и името се дело и желба на - Карл Пилкингтон, богот меѓу луѓето. Плус, сака да лета.

Настанот е важен со самото тоа што го најавува почетокот на втората сезона од еден од најважните социолошки експерименти од овој период на постоењето на човештвото - "The Moaning of Life," документарецот во кој Карл Пилкингтон шета низ планетава и го запознава светот.

Излишноста на битисувањето и она што ние мислиме дека е живот, што е реалност, а што не е, алиенација на младите од општеството, институции и правила неподготвени за утре, се само дел од проблемите кои Карл одамна ги има совладано, за денес да се справува морални и филозофски дилеми на сосема друго ниво, кои директно задираат во маките на обичниот човек.

Човекот има проблем со слоганот "Question Everything" на Сајанс каналот. Необорливата логика му е - не прашувај сè, прашувај тоа што те интересира. Сака да каже, не може исто да се однесуваш на кафе, и кога на доктор ќе ти речат соблечи панталоните и наведни се.

Лошото претчуство не нè излажа. Дека нашиот херој (најмаалски на свет, Хомер Симпсон од вистинскиот живот, Борат кој не се преправа дека е Борат, дечкото со најздрави прашања евер) веќе бил во Македонија а ние тоа сме го пропуштиле!