П.с. реално кучињата во Кина имаат многу поголеми проблеми од петардите за на кого било да му падне на памет да прави кампања да не се рокаат петарди и огномети за Новата година.

Го начекаа во Давос првиот човек на Фајзер и едно три минути го напнаа зошто лажел/молчел за вакцината и трансмисијата на вирусот. Со наведната глава, Бурла одмолчи, каејќи се што решил да оди пешки. Бадијала плебсот ќе се сити, тој утре пак ќе се разбуди со милијардите кои ги направи, меѓу другото и со Урсула од ЕК, која му нарача по 10 вакцини за секој човек од ЕУ. 

Во сè се согласуваме со Горчин Стојановиќ (театарски режисер), од тоа дека не сме сигурни дека враќање на Џони би било паметно и дека би сакале тоа да го гледаме, до она дека ќе треба уште долго време да се сфати каков неповторлив опус тој ни остави, две третини песни да се успешни, половина одлични а една четвртина - генијални.

По 30 години криење, вчера во Палермо е уапсен првиот човек на Коза ностра, Матео Месина Денаро (да беше од Битола, Денаро ќе го викаа Инфлацијата). Првото „благодарам“ за полицијата дојде од соседите на Денаро.

Куршевел е името на францускиот алпски ски-ресорт што дури и вашите најбогати пријатели се воздржуваат да го изговорaт да не случајно некој спомне да се оди таму на зимување. Тоа не значи дека кафаните во Куршевел се празни и дека нема кој да оди.

Мик Волас, член на Европскиот парламент не може да се изначуди како толку бргу исчезна интересот за тоа кој е одговорен за саботажата на Нордстрим, учебникарски пример за еко-тероризам во кој се случи најголемото испуштање метан во историјата.

Питер Зеихан е американски геополитички аналитичар кој со децении се занимава Кина, Русија, арапски свет и слични теми. Деновиве тој гостуваше кај Роган и даде ретко оптимистички (за САД) предвидувања за светот, во кои главно САД во иднината и немаат од што да се грижат, во однос на она што денес се смета за најголема закана - Кина и Русија.

Босански професор за сржта на лоповлукот на секој еден што има каква било власт на Балканов. Тоа што на толку крадење никој не одговарал, тоа е сосема друг проблем.

Човек застанат на пешачки на кој стандардно има вир за време и после секое врнење. Еднаш човекот пред вирот е со чадор и мобилен. Друг пат е со чадор и полна цигла. Да видите како циглата врши работа во подобрување на видот на возачите.

Празнициве додека се излежаваш на кауч како морж во полукоматозна состојба, а телото се обидува да ги обработи нечовечките количини храна што ги имаш товарено во твојот желудник, од голема корист за твојот брак ќе биде ако со видеово ја потсетиш жена ти дека не пуштила машина за перење. За дополнителен впечаток може да се употребат зборовите „а тебе те мрзи две копчиња да стиснеш“.

Мала видео компилација од моменти кога деца со оштетен вид, со помош на специјално изработени наочари, успеваат да си ги видат своите родители. Монументално ежење и убаво во душата.

Нам подеднакво глупи ни се и оние тврдења дека сè е заговор, и оние кои ќе ве убедуваат дека ништо не е заговор и дека не постојат злотвори кои зад грб на јавноста се договараат за пакости. Откако нурна во механизмите на Твитер, новиот газда сумира „Сè што важеше како теорија на заговор за Твитер, се покажа како вистина.“ 

Да го чуете Џон Форд од едно интервју со Питер Богданович. Куроболие на најјако. Па после Спилберг да раскаже како изгледала неговата средба со филмскиот маг. Па после Скорсезе како вешто го позиционира во историски контекст. На сите нив мислиме кога викаме фраери, ама најмногу на Џон Форд. 

Многу луда видео приказна. За несреќа, се урнисува хеликоптер кој носи срце од донор. Но, дури тогаш работите стануваат луди. За среќа, луѓето успеваат да го извлечат срцето од превртениот хеликоптер. За несреќа, човекот кој го презема срцето во свои раце, попат паѓа, сосе срцето. Којзнае како сè ќе се развива оваа приказна....

Некогашниот српски претседател, Војислав Коштуница го имаат убедено дека Србија ќе влезе во Европа ако започне соработката со Хашкиот трибунал. Таман почна трансферот на луѓе во Хаг, на дневен ред се појавува нов услов -  Косово. Па сега се санкциите кон Русија. Утре ќе бидат санкциите кон Кина... „Крај нема тоа“, порачува Коста Чавошки. 

„Навистина се надевам дека вие од Украина и рускиот претседател Владимир Путин ќе најдете начин да ги решите меѓусебните проблеми“, му кажа своевремено Доналд Трамп на украинскиот претседател Владимир Зеленски. Кога дојде време Трамп да звучи како глас на разумот, јасно е какво време е дојдено.  

Или како автомобилската критика (Кларксон и ко.) дееволуираше во она што денес го имаме, што во основа се сведува на читање на техничката спецификација од производителот.

„Ја предупредуваме Турција да се повлече од Сирија“, одважно му кажа швeдската министерка за дипломатија Ан Линд на својот турски колега. „Не џанам дека ова стварно ми го кажа??“, веројатно помисли Турчинот пред да го испука својот одговор, на крај галантно порачувајќи ѝ „Ништо лично“. 

Не се фејкови, туку автентични, оригинални Гибсон гитари. И не ги уништива некој радикално религиозен режим затоа што така му се сонило, туку се уништени на барање на Гибсон. На кратко станува збор за моделот Фајрбрд Икс, една од најлошите гитари излезени од компанијата, толку неквалитетна што Гибсон немаше намера ни да ја распродава, туку само сака веќе да ја нема на светот.

Како што се тркалаше Светското во Катар, а Ивана Кнол по трибините на Мундијалот, така на српските медиуми се појави теоријата дека облините на Кнол се заговор на странските тајни служби против српската младина и нивната посветеност кон патриотизмот. Тек па да видат на Инстаграм што се случува.

Холандската држава и нејзините органи за ред и мир прилично дрско им покажуваше на земјоделците кој е главен, сосе пукање, инфилтрација на провокатори и други демократски методи. Едно мало видео потсетување како би изгледала божиќната трпеза да не се луѓето од нивите и фармите.

Се работи за едно целосно небитно гратче чие постоење со векови по ништо не е спектакуларно се до март 2022, кога работите тргнуваат на полошо, откако тоа се наоѓа на линијата на фронтот во војната меѓу Украина и Русија. Снимката е од Т-80БВ тенк на руските сили, а пустелијата што ја гледате е Марјинка.

Почнале да инсталираат дефибрилатори во предградија на Мелбурн, за секој граѓанин да има брз пристап до ваков апарат, во ситуација кога земјата се соочува со зголемен број неочекувани инфаркти. Планот е секој таму да има дефибрилатор оддалечен најмногу 400 метра од дома. Клучни се првите шест минути од инфарктот.

Луѓе со дипломи, бели мантили и лаборатории седнале да изучуваат пуштање вода во ВЦ шолја. Заклучиле дека при пуштање вода од шолјата излегува еден облак микро-фекалии, кои освен гнасниот дел, со себе носат и бактерии, патогени и вируси, што пак е послебно одвратно во јавни тоалети. За да не мора да ви објаснуваат што точно се случува, ви снимиле видео.