Германскиот јазик убаво му стои на Хегел, на Меркел, на Шварценегер и знаете уште на кој. Како тој ист јазик звучи на соул песни од легендарната продукција на Мотаун?
Видео спот за французинката Боги и нејзината песна Nouveau Parfum. Импресивно ретуширање во видео. Останува уште во живо да можеме вака да си го разубавуваме светот.
Се вика Макс Мартин, и веројатно немате чуено за него, ама тоа е затоа што човекот не се појавува никаде и не дава интервјуа (во 2009-та има дадено интервју во кое кажува дека тоа му е второ интервју во живот). Затоа, сигурно имате чуено тоа што го пишувал. П.С. не е овој на тамбот.
Дин Зимер е најдобриот пример дека се свири исклучиво од - срце. Како инаку ќе го објасните фактот дека човекот боледува од една ретка болест на коските (артрогрипоза) поради која практично не може да ги движи зглобовите а истовремено е фасцинантен тапанар со уникатен стил.
За сите оние кои ги имате во друштво а кога сте излезени/заседнати редовно кенкаат дека треба да се оди дома пошто ова, она, денес биле уморни, утре имаат триста работи уште од најрано сабајле.... и такви работи. Бонус: консензуално весела публика, џигерици безброј, Конан Д Барбериан на хармоника.
Има 16 години, и се вика Дејвид Тибаол, а не Елвис Присли, ама нема да ни верувате се додека не го чуете. Пуштете го некому без гледање и да видите што ќе ви каже кој е.
Лекција за тапанари - каков звук вади еден ист тапан ставен во различни околини: гаража, стадион, паркинг... Дечкото одлично тропа, а и има најдено некој што одлично знае да монтира.
Затоа што цела година ги вртеа, сега ќе ви бидат доволни 3 секунди за да ви дојде песната. И сите овие 20 песни споени во 1 минута, во микс кој има некаква логика.
Песната е стара, фората е многу нова. Го пушташ видеото, почнуваш да вртиш по каналите и сите ти ја пеат 'Like A Rolling Stone' од Боб Дилан. Далеку подборо од други варијанти кога пушташ ТВ, а сите ти пеат иста песна.
Малку играње со потенциометри и Wrecking Ball на Мајли Сајрус од една, така банална поп песна, се претвора во хорор кој на времето комотно би го потпишала Лори Андерсон.
Та не е само Влатко, та не е само Мирослав. Македонска песна пасент ѝ стои и на класичната гитара на Бошко Јовиќ од Зеница, кој понекогаш звучи како Патакот и Тадиќ заедно. Овој босански гитарист разбира што е севдах, а тој што разбира што е севдах, нема шанси да ја утне Македонија.
Од последниот албум, цели 36 години од нивното деби во 1977-ма. Триото Леми (67г.), Фил Кембел и Мики Ди, со цел арсенал во раце, бучни како праведници, се уште посилни од убиственото комбо "текила -пиво- цигари". Накратко, Моторхед, рокање газови.
Уште од 1986-та, Нил Јанг и неговата сопруга Пеги секој година организираат хуманитарен концерт за Bridge School, непрофитна организација за иновативни начини на помош на деца со пречки во говорот и инвалидитет. Годинава дојдоа 25.000 луѓе и имаше многу добри музички моменти.
Знаете она, од првиот Волверин, кога ги убиваат надарените мутанти па им земаат крв за оној злотворот да ги соедини сите нивни дарби во еден супер мутант? Во музичка смисла, го имаме!
Овој апокалиптичен израз на лицето во кој се меша шок, паника, очај, изгубеност и желба да се пропадне во земја ѝ припаѓа на португалската пијанистка Мариа Жоао Пиреш, во моментот кога сфаќа дека оркестарот почнува да свири друго дело а не она кое таа го спремала. Ноќна мора! Сè е фатено на видео снимка, брилијантно парче реална драма кое - пази спојлер - завршува со хепиенд.
Дечково ја свири Бумбаров лет на 220 bpm. На тоа темпо звучи фасцинантно. Ама после забрзува на 260... 300.... 325... и на крај, на 350 bpm звучи перверзно! Да сум јас оној што го снима со видео, на крајот би му рекол: Ок, оваа ја знаеш.
