Американците ги имаат космодромите Кејп Канаверал и Кенеди Спејс Центар, Русите Бајконур, Кинезите Ѓуќуен. Кај нас одбројување се прави кога се пали елка. Тоа кај нас е ежењето. За оние како нас кои уживаат во својот хроничен недостаток на новогодишно расположение и еуфорија (славиме отприлика вака), сакаме да се организира одбројување кога ќе се гаси. 

На влез на нова зграда кај Железничка станица

Како што Мајкл Џордан неповратно е врзан со Најк, како што Стив Џобс е првата асоцијација на спомнување на Епл а Кока кола го ембедираше Дедо Мраз во својот бренд, така Албер од село Лажец е драгоцено заштитно лице на битолски дистрибутери на земјоделска машинерија. Подобар не можеле да најдат! Албер Рушидовски не е манекенска шасија, тој е лајфкоуч и мотивационен гуру чија љубов и страст кон работата е неодолива. 

Доволно беше негде на пазарче да го прашаат „Дали вие јадете карфиол?“, за нашиов зналац уверливо да образложи зошто неговиот одговор е „Бог да чува“ да опредупреди дека тоа „штеди на желудец“ и да ја изнесе биолошката логика на човековата исхрана. Накратко: имате ли очници (песјаци)? Имате. Тие заби за кинење карфиол ли се правени?