Балканштина

Предупредување: Ова боли

Веројатно ви е позната нашата пасија за шкарт музика (ама онаа што е чудесно шкарт, обичниот шкарт го имате на Топ листи) па со вас се имаме радувано на безброј фасцинантни ликови од сивата зона. Дечково е еден од нив. Како да е несреќник излезен од онаа емисија „Проводаџија“. Некои ќе се пожалат што воз никогаш нема кога најмногу треба а најјакиот совет кој му е даден досега гласи: „Игнорирај ги позитивните коментари“.  Дарио и песната „Ова боли“. Точно.

Бугари против Хеловин

Сцена од Благоевград од бучни протести против западниот Хеловин со намера да се вратат луѓето на „патриотскиот Хеловин“ кои го викаат Кукери и на кој, негде пред Нова година, со маски, костуми и клопотарци, се протеруваат лошите духови. Бонус предност: на Кукери не се главни колачите туку ракијата. 

Филозофијата на баба Љубица

Баба Љубица е фото робот за архетипска балканска жена од постарите модели. Домаќинка е, знае и сака да готви (на мрсно не штеди), ама е јако наивна па најјаките и најискрените работи ги кажува кога мисли дека не ја снимаат. Овде го сомничи внукот дека потпаднал под влијание на некоја секта а кога ќе ѝ кажат дека тој е филозоф, Љубица со полна емпатија ќе каже: Тешко њему!

Свети Филтер Инстаграмски

Екипата на Иван Ивановиќ ѝ фаќа сеир на Маја Николиќ, српска пејачка, станарка на Фарми и други реални шоуа и од пред некое време јак верник. Маја решила да ја промовира книгата „Чудотворец“ за свети Нектариј Егински. А Маја кога објавува нешто на социјални мрежи, редовно користи филтер. Верски неутралниот филтер решил да го разубави и подмлади и Нектариј. 

Брак се чита меѓу редови

Жената разумно го сумира нивниот долг заеднички живот, имало тешки моменти кои требало заедно да се пребродат, имало и убави моменти а најважно од сè, вика, е кога меѓу двајца има разбирање и почит. Но, сликата за нивниот брак станува 3Д дури откако таа ќе заврши па ќе му рече и тој да каже нешто.