Има кај Србите една водителка по утрински емисии, мавната начисто, самоуверен егзибиционист со  амбиции да стане светски позната како Џенифер Лопез и еден ден да се кандидира за претседателка на Србија, што добар дел гледачи го доживуваат како закана па си викаат „дај нека бомбардираат оние уште еднаш.“ Јована Јеремиќ. Немаме ние таква. Сè уште. 

Девојка од оние српски пералници на мозок и масовни убијци на мозочни клети, нагалено наречени реални шоуа. Очигледно некој ѝ рекол дека е плитка. Но, нема таа да замолчи, има она одговор. Можеби е плитка но никогаш нема да потоне. Следи закуцавањето.

Се собрале од бугарската амбасада во Македонија за да му одадат последен поздрав на неодамна починатиот Пеле (ништо чудно ако и него не го рачунаат за Бугар). Со пригодна реч и минута молчење. Со себе го имаат неговиот „најљубим предмет“ - топката. Но имаат и сценарио во кое топката не е пасивна.

Покоен Жељко Малнар чат-пат знаеше да го пушти Јаран надвор од студио за да му глуми репортер од теренот.  Овојпат го имаме легендарното парче со Јаран и Владо Калембер и најјакото прво прашање кое сме го чуле во едно интервју. И едно друг видевце кога Јаран наидува на отпор од кој господски се повлекува.

Криминалецот Кристијан Голубовиќ, еден од ретките преживеани од документарецот „Видимо се у читуљи,“ последниве години се влече по реални шоуа (не е јасно дали е тоа помало зло)  и „продава“ приказни од асфалтот и од дешавки од другата страна на законот. Второво го прави махерски забавно, како да раскажува кунг-фу филм.  

Драги живее во село близу Лесковац, вреден е ама тенок со нерви. Има 80 години, има еден ипол падеж и за жал, има фамилија која стално го ремети, за да ги извади пцовките од него. Главно внук му кој и го снима, син му, а во приказната се и бабата на Драги и Тајсон (ќе го познаете не по мускулите туку по тетоважата на лице).

Три ренесансно образувани грации, црпнати од некое српско реално шоу (сори што не им ги знаеме имињата; нешто како Маца Дискреција, Тијана Ајфон, Благица Самсунг...) одговараат на ТВ квиз, прашања од географија, најбазични. Како што знаете и од порано, не е убаво да се црпнуваат луѓе од онаму каде што природно припаѓаат.

Кога случајно сакаш да поработиш, седни, причекај, ќе видиш дека ти пројде. Кога гледаш дека јадат и пијат - придружи им се, кога гледаш дека работат - истави се за да не пречиш.