Цане од Партибрејкерс ја напушти емисијата „Впечаток на неделата“ на Оља Беќковиќ на самиот почеток, по претставување на гостите и првата пауза за реклами. На заминувањето му претходеше чудна кавга околу децибелите. Оља со оној нејзин монашки шепот веројатно не добацуваше до Цане па овој ѝ кажа дека мора да ѝ чита од уста и дека можеби треба да се титлува. Па оваа му врати па Цане го снема.

За да добијат пари за изборно рекламирање се имаат пријавено 249 портали. Не е поентата што има таму и шуто и рогато. Поентата е дека ќе се прават дубари со државни пари. Криминал. „Идејата е сите тие фејк портали да послужат за перење пари. Некои партии на таквите "портали" ќе им дадат пари за политичко рекламирање, а газдите на тие портали потоа (а најчесто и пред тоа) ќе ги вратат парите во партиите во кеш“, пишува Героски.

Во фото финиш на процесот во Лондон од кој зависи дали Асанж ќе биде екстрадиран и ќе скапе во американски затвор, Едвард Сноуден го упати следниов апел “До секој политичар и новинар (ви рековме?): Не можете да го спасите Навални. Но Асанж сè уште можете. Ако молчите сега, кога можете да влијаете на исходот, никогаш не ви било до принципи, само сте се надевале на аплаузи“.

Благодарејќи на поплавата од подкасти која потсетува на некогашната манија за отворање „пица на парче“, “скара на кило“ или “салатари“ (искрено им посакуваме да не завршат така), се појави и нешто што малкуцка замирисува на нашата најомилена емисија на просторите на екс Ју, феноменалната „Ноќна мора“ на Жељко Малнар. Мотивите им се различни од оние на Шева, Јаран, Брацо и компанија, ама нивото е тоа.

Миленко имал емисија на Јутјуб во која запукал по Вистиномерите (гаден каков што знае да биде со оние кои ги рачуна за душмани) а ЗНМ се најде повикано не само да се стави во одбрана на прозваните колеги, туку и да лупета за организирани хајки, да бара преземање итни мерки, да спомнува затвори... Не ни е нам толку до Миленко (мада му ги сакаме Винтиџите), колку до нашата слобода и лицемерието на овие другиве.

Судејќи по „белата врева“ што бучи од социјалните мрежи, човек може да добие впечаток дека ама баш цела Македонија се бави и си треска глава со истите прашања: како беше можно да се случи ова со пасошите, дали се они нормални, дали на следните избори ќе рикнат ко магариња или пак само дебело ќе изгубат... Но, не е така. Во пукнатините на овие големи инфо блокови се вмрежуваат и меѓусебе си помагаат страсни филмофили.  

После долга и тешка болест, на 74 годишна возраст почина брилијантниот Петар Луковиќ, еден од најзначајните пера на екс југословенските простори на сите времиња. Во нашата интимна ранг листа на новинарски ракописи, Перо Луковиќ  суверено се наоѓа во шампионскиот кајак-двосед, заедно со - фала богу живиот - Борис Дежуловиќ.

Хрватски пуританци од католичка асоцијација кои талибански се згрозуваат од сè што мажите може да ги возбуди, на РТЛ им стегнале пријава за непримерено однесување; емитувале порно глумица во прилог за сексуална едукација (како се навлекува кондом). Зоран Шпрајц им објаснува дека за секоја лекција се обидуваат да ги имаат најмеродавните стручњаци. А после им ја закуцува поентата.

На денешен ден (11 декември) во 2016 година, почина Есма Реџепова, светски познатата ромска кралица на музиката од Македонија. Еве како за тоа во јавноста известуваше омилениот „новинар“ на октроираната власт на чело со Зоран Заев, Никола Димитров, Оливер Спасовски итн. што ја преименува и обезличи Македонија.