Најголемите успеси на Алесандрија се меѓу 1929-та и 1960-та кога играле 13 сезони во Серија А, како и едно финале во Куп во 1936 година. По долго време, еве ги пак на насловните страници, со нова сензација и пласман во четвртфинале каде ќе играат со подобриот од дуелот меѓу Рома и Специја.
Алесандрија игра на стадионче со едвај 6.000 седишта, а тренер им е Анџело Грегучи, екс играч на Лацио кој во Серија А ги тренирал Лече и Аталанта.
Скоро секоја сезона во второто во важност натпреварување во Италија има по некое изненадување, а меѓу најголемите е пехарот на Виченца пред 17 години.
АНКОНА (1993/1994). Во Серија Б завршија осми, а во Купот на Италија ги елиминираа Џаре, Наполи, Авелино, Венеција и Торино и стигнаа до финале. Но таму се сретнаа со силната Сампдорија во која играа Гулит, Југовиќ, Катанец, Манчини, Паљука и загубија 6:1.
ФОЏА (1994/1995). Таа сезона Фоџа ги имаше Луиџи Ди Бјаџо, Лука Аморузо и Мауро Бресан. Не успеа да се спаси во Серија А, но во Купот успеаа да стигнат до полуфинале каде налетаа на Парма.
АТАЛАНТА (1995/1996). Следната сезона изненадување беше Аталанта која успеа да опстане во прва лига и во Куп да ги елиминира Кремонезе, Јувентус, Каљари и Болоња. Во финале загубија од Фиорентина. Тимот од Бергамо тогаш во тимот ги имаше младите Монтеро и Виери.
ВИЧЕНЦА (1996/1997). Франческо Гвидолин во 1998 година се појави на европска сцена во Купот на Куповите, а една година претходно заврши на осмо место во Серија А и направи сензација во Купот на Италија. На патот им застанаа Џенова, Милан и Болоња, а во финале го треснаа Наполи.
БОЛОЊА (1998/1999). Во напад тандемот Андерсон – Сињори, а на клупа Карло Мацоне. Таа сезона Болоња го освои Интертото купот, беше деветта во Серија А и стигна до две полуфиналиња, Куп на УЕФА и Куп на Италија каде загуби од Фиорентина.
ВЕНЕЦИЈА (1999/2000). Сменија тројца тренери меѓу кои и Спалети и не успеаа да опстанат во прва лига. Но во Куп им го земаа скалпот на Песката, Удинезе и Фиорентина. Во полуфинале не можеа против Лацио, кој таа сезона стана шампион на Италија.
КАЉАРИ (1999/2000). Иста судбина таа сезона ги снајде и Каљари. Испаднаа од Серија А, а во Куп стигнаа до полуфинале. На првиот меч дома загубија од Интер 1:3, а потоа победија на гости 1:2.
БРЕША (2000/2001). Мацоне во составот на Бреша таа сезона ги имаше Баџо, Тони и Гвардиола кои успеаа со големи тешкотии да останат во лига, а во Куп стигнаа до полуфинале каде загубија од Парма.
ПЕРУЏА (2001/2002). Следната сезона изненадување во Купот беше Перуџа која во четвртфинале го елиминираа Јувентус и тоа со помош на позајмениот Фабрицио Миколи од Бјанконерите кој им даде три од четирите гола. Во полуфинале го намачија Милан, но не успеаа да го совладаат.
КАЉАРИ (2004/2005). Со помош на предводникот Франческо Ѕола, тимот од Сардинија се врати во Серија А и во Куп ги мина Триестина, Лацио и Сампдорија. Паднаа во полуфинале против Интер.
КАТАНИЈА (2007/2008). Во големата неизвесна завршница, Катанија успеа да остане во Серија А, но и да направи изненадување во Купот каде паднаа Триестина, Милан и Удинезе. Во полуфинале загубија тесно од Рома (0:1,1:1).
СИЕНА (2011/2012). Само што се вратија во Серија А, почнаа да прават изненадувања. Торино, Каљари, Палермо и Киево ги збришаа во Куп, а во полуфинале беа елиминирани од Наполи.
