Наддавањето за сликата од Исус создадена во 1500-те години, започна на 70 милиони долари, заврши на 400 милиони, а разликата до 450 милиони е за најразлични давачки и бонуси што новиот сопственик треба да ги плати. Ова е една од помалку од 20-те уметнички фотографии кои денеска постојат, а за кои се верува дека се на Леонардо Да Винчи. Аукциската куќа Кристис вршеше пренос во живо од целиот настан, а подоцна и објави скратено видео од наддавањето.

Иако е крајно нефер да споредуваш електричен автомобил со автомобил со регуларен мотор (бензин / дизел), забрзувањето на Теслата секој пат до сега изгледа спектакуларно. Сега кога 0 до 100 од 2,5 го намалија на 1,9 ова веќе станува тешко за верување.

Прва лекција, немој да паркираш блиску до пруга. Прва лекција под Б, на тој што паркира блиску до пруга возот за ништо не му е крив.

Или: зошто најнекомпетентните луѓе мислат дека се најдобри.

Еден од непогрешивите начини е - дај му да нацрта нешто што ќе го истетовираш на себе. Што ќе речат некои искусни родители „оди па кажи му после дека мора да јаде боранија“.

Поентата на Шапел е дека за да успееш во Холивуд (шоубизнис општо), посебно за тоа да достигне глобални размери, мора, ама мора, да си ужасно силен како човек (како карактер). Прашањето на Шапел (11 години пред есенва да почнат да се редат секакви непријатности од Холивуд), е што тоа треба да му се случи на така силен човек за да доживее крах, како што се случува да видиме од некои од најпознатите ѕвезди.

Интересен и поучен експеримент во Бургер Кинг, прилично индикативен за човековата природа. Луѓето имаат изострен инстинкт да се побунат ако некој им ја „измалтретира“ нивната порција. Кога истото тоа му се случува на човек (во случајов момче) во нивна близина, мнозинството главно нема проблем со апетитот.

Иако со квалитетни информации (пример како лежат возачите на Ф1 додека возат) и со одлично изведен разговор меѓу водителот и гостинот, главниот лик на видеото е Ф1 болидот на Мерцедес. Технички болидот не е таму, тоа што ќе го видите на клипот е компјутерски генериран болид, и ќе мислите дека измислуваме.

Ако треба во едно видео да го сведеш избегнувањето данок од ултра богатите мултинационални гиганти, ова е тоа.

Логиката е дека систем кој милиони години еволуира, се штелува и адаптира, и е поставен така што во секоја негова нова верзија треба да се пренесуваат само подобрените и унапредени функционалности и можности, зависи од тоа дали ти ќе купиш нешто за да му помогнеш да се прочисти и спаси од токсини. Од друга страна па, зошто некој би стоел на патот на вашата клизма?

На шведската пошта, Постнорд, редовно и фалат најразлични пратки од поштенските камиони. За да не обесуваат со години, овој камионџија нè краде, оној камионџија нè краде, решаваат кај пратките да монтираат камери. И стварно не краделе камионџиите, туку нинџи, или како и да се викаат луѓе што можат да се качат на камион што се движи со 80 км/ч, да отворат врата, да влезат во приколка и после сè да излезат и да затворат како ништо да не било.

Во 1953 на Холандија и се случува масовна поплава која ја потопува дотогашната холандска заштита од поплави. Загинуваат над 2.500 лица (спроед Википедија), а поплавено е речиси 9% од вкупното обработливо земјиште во Холандија. По ова Холанѓаните се зафаќаат со изработка на Делта проектот, кој е прогласен за едно од новите Седум светски чуда.

Ќе го учиш, ќе го пазиш, ќе го носиш на курсеви и семинари за човечко понашање, и ќе го седнеш пред камера за на крај пак да ти каже дека најтежок момент во живот му бил кога одбил 1 милијарда долари. И како после луѓе да не веруваат дека е робот?

Момците од Славонија на Кикстартер бараа 30.000 долари за почеток на производство на масата. Собраа 35.000 илјади. Идејата зад која парите ги ставија над 100 луѓе е маса составена од модули (коцки) кои се распоредуваат како што на тебе ќе ти текне или ќе ти треба во канцеларија или соба.

Вечерале заедно пред 15 години. „Поголем нарцис немам видено“, се сеќава Вуди Харелсон кој морал да излегува и да пали џоинт од што Трамп не се трпел.

Све тоа фино, ама и покрај тоа што на првата меѓународна рамноземјашка конференција (бидејќи е во Америка, на другите континенти се локални) главно ќе се збори за тепсијата ко главно оружје во борбата против глобалистичкиот модел, на првата линија на фронтот на истражувањата искочи - баклавата. Земјата е рамна 3Д баклава во непоимлива 4Д (или 11 или 23, бирајте математичка теорија) вселена. Кој досега не полудил, време му е.

Имаш човек што мисли дека знае магија и што мисли дека има другар. Греши и за двете работи.

Лани Адоуб извади морничав „Фотошоп за аудио“ што на видео снимка додава аудио кое никогаш не е кажано. Годинава го прикажа ProjectCloak, алатка која комплетно отстранува кој било објект од какво било видео. И работи непријатно добро.

Денес во Холивуд ќе најдете многу просветителки кои ги охрабруваат жртвите на Вајнстин да проговорат (иако сите признаваат дека ги знаеле муабетите и пред да пукне скандалот). За истиот предатор некој предупредил уште пред 12 години. Кортни Лав, 2005-та.

Само треба да им кажеш дека реформите на даночната политика кои им ги читаш се на Берни Сандерс. Во тој случај, сè што е всушност на Трамп, кај оваа лоботомирана „авангарда“ проаѓа мазно.

Приказната за Кевин Вилошу, кој уште во 80-тите беше еден од најбитните фигури во радикалниот фашистички Национален фронт на Велика Британија. Цели 40 години од својот живот Вилшоу поминува во некаква политичка омраза - расна, националистичка, хомофобна... Сè додека не собрал сила да признае дека е Евреј (делумно) и геј (комплетно).

Откако добија дозвола од семејството на Бенингтон, Линкин парк ја објавија нивната епизода на Карпул караоке, снимана само неколку денови пред самоубиството на Бенингтон. Во клипот Честер речиси идентично радосен и насмеан како во видеото објавено од неговата сопруга, и со идентично совршено маскирана депресија.

Стандардот за квалитет на камерата што упорно се повторува на секоја можна презентација на секој нов смартфон од Ајфон до Пиксел и Галакси, се нарекува DxOMark и е малку покомпликуван отколку што тоа звучи на презентацијата или како е пренесен во медиумите. На пример тоа што Пиксел 2 доби оценка 98 не значи дека тоа е просекот од оценките на разните сегменти или пак дека оценката е 98 од максимални 100.

Кога летоска Рок се побуни против сајтот за ангрегирање оценки за филмови, општата реакција беше отприлика - па што глумиш во римејк на Чувари на плажата, ако не сакаш да те ругаат. Пред некој ден и Скросезе го зашамара агрегаторот.