„Behind the Curve“ е документарец на Нетфликс на тема рамна Земја и рамноземјаши, и немате поим каква празнина имате во живот ако до сега не сте го гледале. Освен што има некои фантастични концепти што ќе ги чуете од рамноземјашите (не постои небо, туку тоа е џиновски дисплеј), има и нивни искрени обиди со издржани експерименти да ја докажат својата позиција, дека Земјата е навистина рамна. Ова е еден од тие експерименти.

Прволигашката табела го опфаќа периодот од 2000 до 2018, и најсурово прикажува како денешните технолошки гиганти ги сотреа сите индустрии околу себе, и како компании кои пред неполни 20 години вредеа милијарди долари денес се речиси комплетно збришани.

Не како мерка на фискални пицајзли, туку како начин за воодушевување на ремек делото од кое е составена секоја една банкнота од 100 долари, и неверојатните технологии имплементирани во неа чисто затоа што можат, а и од превентива.

Приказната многу повеќе вреди заради инсајдерското инфо што го споделува за механизмите и размислувањето на Холивуд, отколку заради тоа што е Вил Смит. Да е до него тој не би го снимил ни „Луѓе во црно“, ама добива телефонски повик од Спилберг (продуцент на Луѓе во црно) со молба „дај направи ми една услуга за ова, не го користи твојот мозок, користи го мојот“. Само заради ова Смит решава да учествува во Луѓе во црно. За Матрикс никој не му се јавува, па Смит се зафаќа да го снима Див, див Запад.

Уште една од неброените дебати околу брегзит на британските телевизии, со таа разлика што овој пат една од анти-брегзит активистките (инаку академик на Кембриџ, а и феминистка) решава на дебата да дојде топлес, за луѓе да почнат да обрнуваат внимание на она што го зборува. Жената добива поддршка.

Што ве знаеме што за Валентајн сте добиле од вашата драга. Затоа, може ќе ви притреба ова упатство.

Процедурата се одвива на мобилен и не треба ништо да закачуваш или пипаш на тротинетот, туку само да го начекаш како стои на семафор на десетина секунди. За едни ќе бидеш говедо што си му го исклучил тротинетот на некој непознат човек, за други ќе бидеш херој што си спасил од срам некој непознат човек и си го симнал од тоа смешната, бездостоинствена, направа.

Питер Богданович го смета за најголемиот во историјата на немата, црно-бела комедија. Но, дури и да ви е фаворит Чаплин ( или Станлио и Олио, што ве знаеме), каскадерските вратоломии на Китон денес не би имал храброст да ги повтори ни Џеки Чен, дури и кога би бил во дервишки транс помогнат од галантни количини ЛСД. Китон се потпирал на прецизна математика, железни нерви и кохонес, од оние најголемите. Приватно бил намќор, со проблеми со алкохолот, ама на платно тоа изгледа вака:

Три работи: Прво, Жижек има свој осврт на фејк-њуз што е и како е; второ, на РТ; трето, каде од пред некое време има сопствена емисија под наслов „Како да ги гледате вестите, со Славој Жижек“.

На Фејсбук и посебно Инстаграм луѓе изгледаат како да имаат подобар и посреќен живот отколку што стварно имаат. Луѓе ги гледаат ваквите фејк претстави, потајно мислејќи си - нит сум толку среќен, нит така добро изгледам, значи сигурно не ме бива. И кругот се повторува. Во реалноста, првите ниту се толку способни, ниту се толку среќни (добар дел страдаат од депресија и слично), а и никој не изгледа добро цело време; вторите, не се ни толку несреќни, ни толку грди. Дослушајте што друго имаат да кажат Елон Маск и Џо Роган на тема социјални медиуми.

Истиов човек пред некое време ја објаснуваше измамата со жолтите банкомати во Прага (и низ цела Европа). Овој пат измамата е полокална и се однесува на трафики и продавници за цигари и ситнурија во Прага, а се сведува на тоа дека имаат две различни цени, една за локалци, една за вас прекрасни туристи.

Како поле во кое митовите и новите трендови се во констатен галоп, прегазувајќи се еден со друг, колку да излезат на површина барем на некое време, малку е веројатно дека она што денес сметаме за „бибилија“ во исхраната, во некои следни 25 години нема да биде слично смешно.

Во Хаваи е предложен закон за постепено зголемување на старосната граница за купување цигари. На крај на „прилагодувањето“ (во 2024 година) треба да испадне дека е забрането за секој под 100 години.

Како за две визуелни уметности, не е чудно што ликовната и филмската често се „дирну“ (од дихотомијата кај Звонко Богдан „Ил се дирну ил се не додирну“). Филмски сцени со референца на некои ликовно уметничко дело.

Видео приказ на температурните аномалиии во светот (нè има и нас) од 1880та година до денешни времиња. Почекајте да дојдат 90-тите, да видите како почна да се вари жабата.

Ако на здрав начин го сакате Оливер, на здрав начин ќе ве фасцинира и ова педантно рашрафување на неговата емисија за Венецуела. Што сокрил, што кажал погрешно, што извадил од контекст, што спинувал.... Колку само многу време, енергија, знаење и информации се вложуваат во обид да се дебатира со политички неистомисленик! Кај нас би било доволно да го прогласите за небањат или продаден. Гледајте на раат, многу се дознава и за Венецуела.

Млад историчар првпат се среќава со елитата од Давос па на еден панел им вика дека ситуацијата на тој самит му изгледа исто како на состанок на пожарникари да е забрането да се зборува за вода. Преведено на давоски терен: никој не зборува за вистинската тема: како милијардерите да не избегнуваат да плаќаат поштени даноци.

Од врвни човекови достигнувања издвојуваме - работи што се упасувани во милиметар. Веројатно меракот да ги гледаш е надминат само од меракот да направиш вакво совршенство.

Не е класичен грабеж ама сепак е грабеж, а целата измама е во курсот и надоместокот што го плаќаш за вадење пари од банкомат. Во видеото станува збор исклучиво за банкомати на Еуронет (жолти со сино лого) и ги има низ цела ЕУ, вклучително и низ градови од локалниов дел од ЕУ (Бугарија и Грција).

Американската национална митологија денес го третира Мартин Лутер Кинг како дел од наративот за исклучителноста на американската нација. А неговата борба со капитализмот? А неговите барања за радикална промена на економскиот поредок? Професор од Принстон за тие замаглени делови од животниот ангажман на човекот кој не беше само „црн херој“.

Кристина Кузмиќ е Хрватка од Осијек која живее во САД и има еден од најпознатите блогови за родителски совети. Како на убава и популарна жена, во коментари и во пораки ѝ се става секаков џган и олош, главно од оние „јаките ебачи“. Бидејќи игногирањето не секогаш дава резултати, и бидејќи таквите џукели не го заслужуваат раатот на анонимноста, Кристина почнала да го прави она што и ние понекогаш го правиме: ги вади јавно, со слики, со имиња и презимиња. И сега, оние најдосадните почнуваат да ѝ звоцаат: ама приватност, ама немој така... Кристина, само така! 

Човекот по сопствена пресметка има 82 години, а по наша пресметка би било греота ако не истера уште толку, со исто здравје и исто расположение.

Инсерт од старата, одлична серија на Би Би Си, „Јас, Клавдиј“, колку да ги заинтересираме луѓето кои не ја гледале (заради младост или бесвест) или пак да го испровоцираме јавниот сервис да ја репризира. Сè што треба да знаете за човечката психопатологија кога е во прашање моќта, сè што треба да знаете за безграничната злоба, лакомост, бруталност и бескрулозност за доаѓање или останување на власт, сè имате таму.