Северот на Сирија. Колона воени возила, половина американски, половина руски. На оваа вторава половина не и се сака да биде позади, а првата половина упорно гради простор. Налет ако вака почне Трета светска војна.

„На Вашингтон не му треба воената помош на членките на НАТО, му треба дипломатското покритие кое НАТО земјите го обезбедуваат за војните на Вашингтон“ - доктор Пол Крег Робертс, економист, предавач на Стенфорд, своевремено советник на американскиот конгрес и висок функционер во администрацијата на Роналд Реган, одликуван со орденот Легија на честа од страна на францускиот претседател Франсоа Митеран.  

Ако овој живот е само мачење а вистинскиот почнува со нашата смрт, зошто онолку попови голтаат апчиња и кмишат по доктори за да си ја продолжат маката?

Пред некој да тргне со легени на Водно, да знаете дека убаво си пишува, не „во шума“ туку „со шума“. Шинрин-јоку е древен јапонски ритуал за ре-конектирање со природата заради низа ментални, духовни и телесни аири кои може да ги  донесе оваа декомпресија од урбаната џунгла.

Сериозно документирана и ефектно прикажана трансформацијата на третиот по големина градот во Сибир во последните две децении. Скопје да гледа и да си поплаче: кај што можело парк - парк, кај што требало улица - улица. Ништо нач'чкано како Дебар маало, ништо закрчено како Кисела вода.  

Ако успеете да го тргнете погледот од расното деколте на Мекензи (или лажно да ја оплакувате како, ете, огромните импланти ѝ ја тегнат кожата), ќе уживате во искрениот и полн со занимливи детали муабет на овие двајца порно ветерани.

Да видите само што содржел „комплетот за преживување“ кој на располагање го имале пилотите на ЈНА. Оној што го составувал пакетот се водел со идејата „ако ти паднал авионот, не мора да ти падне и шеќерот.“

Кујнски фори што веројатно подобро функционираат на видео отколку во кујна, ама затоа што се вака фино спакувани и претставени нема зошто да се сомневаш во нив освен ако не ги пробаш.

Некој од друштвото со себе тегне количка со куп смартфони (кои постојано комуницираат со апликацијата), Гугл тоа го толкува како гужва, ја бои улицата во црвено, другите возачи го гледаат предупредувањето па одбираат алтернативни рути. За тоа време, на раат играте сервис. Победа!

Планот за болницата специјализирана за третман на оболени од коронавирусот (1.000 легла и 1.400 лица медицински персонал) бил направен за пет часа а драфтот на дизајнот за 24 часа. Потоа Кинезите се фатија за работа. Илјадници работници, 800 парчиња тешка механизација, 24 часа на ден. Отворањето на болницата е закажано за 5-ти февруари.

Постои суштинска разлика меѓу осаменост и еден здрав офф. Да се биде сам со себе а тоа да не ти е досадно (бидејќи само празните и досадни луѓе се досадуваат кога се сами). Како дидактичка подготовка за оваа вежба, да се обидеме да ја прочитаме целата порака на Андреј Тарковски без да помислиме дали имаме нови лајкови или нотификации.

Британка, постара, фатила дечко Египќанец, помлад, па ја викнале на утринска програма малку да позбори за врската. А бабата збори, не застанува.

Порториканците деновиве дознаа дека гувернерката на нивната држава, Ванда Ваксез Гарсед, учествувала во проневера на странската помош за земјата, па илјадници од нив решија да ја посетат нејзината државничка палата. За да не одат со празни раце, со себе земале вистинска, во полна големина - гилотина. Ете така, па Ванда нека ја толкува симболиката. 

Филозофијата на последниот Мед Макс (Mad Fury) објаснета од Џорџ Карлин.

Како и за Битлси и Стоунси и многу други такви случаи, медиумите отсекогаш сакале да го пумпаат ривалитетот меѓу познатите лица и ако нема, тогаш вештачки да создаваат тензии меѓу нив. Салвадор Дали одговара за „непријателството “со Пикасо.

Заради безбројни инциденти во минатото, метрото во Њу Делхи веќе подолго време има вагони во кои смеат да се возат само жени. Без разлика колку време е на сила ова правило, мажи упорно се возат со вагоните за жени. Индиската полиција секогаш кога може се труди ова да го корегира, со шамари и заушки.

Додека кај нас со наведната глава возиш покрај кола паркирана на тротоар да не му направиш незгодно на „па нема дечко кај да се паркира“ ликот, британските велосипедисти немаат намера ни на момент да ги отстапат велосипедските ленти што од постојните улици беа издвоени за нив. (Ок, да, тие на своја страна имаат и полиција за која велосипедистите се рамноправни учесници во сообраќајот.)

Најискрениот изблик на среќа што денес ќе го видите на интернет: во делови од Австралија почна да врне дожд и човеков не може да се прибере од среќа.

Како што ќе покаже овој праисториски клип од ТЛН, уште оваа политичка криза и политичари одма ќе се фатат за решавање на проблемот со загаден воздух. До тогаш издржете, купувајте маски, купувајте прочистувачи, не излегувајте надвор, ако ви врши работа купувајте органско за колку толку да ги замачкате наслагите олово во вашето тело и најубаво ќе биде ако може да мислите на проблемите што тие ви ги сервираат, а не на проблемите што вие ги имате.

Има едно непишано правило дека американските републиканци преферират да бомбардираат по Блискиот исток а на американските демократи поинтересен за тоа им е Балканот. На овие простори генерал Весли Кларк е познат по 78 бомбардирање на НАТО. Демократски ориентираниот пензиониран генерал опишува како Пентагон под републиканска палка лесно решава да влетува во воени сценарија на истокот.

Како за други работи, така и за коса, за тие што ја имаат многу е неважно дали ја имаат или не, за тие што ја немаат многу е важно да ја имаат. Како и да е, добро за овие вториве е што работата е многу напредната.

Од гледа точка на компаниите ништо не е поевтинето, само сега и вие сте производот, па разликата во цена ја надополнуваат со продавање на вашите информации, главно што гледате и што не гледате.

Цане од Партибрејкерс веројатно е последниот човек на земјава од кого очекувате да слушнете дека „литургијата е споделување на радоста на својата свесност“. Слушнете ја емисијата и неговата исповед за потребата да не биде само „јас“ туку во своето срце да направи место и за друг. Чудни се патиштата рокерски а Цане, божемепрости, е одличен.

Иако по сите новогодишни и божиќни софри сега е идеално време за совети за слабеење и режими за губење килограми, да не губиме време со празни муабети туку да фатиме друг пат. Како дома да правиме подобри јадења, кои вештини да ги вежбаме, што е суштински за една гозба.... На мени имаме шест светски готвачи.