Европската куќа на фудбалот испрати писмо до ФФМ со 18 недостатоци кои треба да се отстранат на „Телеком арената“ и побара финансиски гаранции од државата дека стадионот ќе биде тип топ спремен за финалето од Супер Купот на Европа, ама не до 8 август, денот кога игра мечот, туку до 21 јули.
На тој ден во Скопје ќе има нова контрола од страна на претставници на УЕФА кои треба да се уверат дека арената е целосно подготвена да ги нагости гигантите Реал Мадрид и Манчестер Јунајтед.
Ова се сите работи кои треба да се довршат во следните неполни месец дена, а инаку тоа под реден број 13 нè потсети на еден скоро одигран пријателски дуел на Македонија, кога на полувреме заедно со коментаторот на северна трибина на полувреме баравме и не најдовме тоалет во функција.
1. Клима уредите на стадионот не се поврзани со УПС системот.
2. Не е јасна комуникацијата меѓу персоналот на стадионот и добавувачот на електрична енергија.
3. Нема инсталирано електрична енергија во делот за телевизиите.
4. Нема инсталирано вентилација во салата за прес-конференции.
5. Нема поставено 50 телевизори од 50 инчи во различни делови од стадионот.
6. Дел од опремата за Ви-Фи не е инсталирана
7. Не е доставен дизајн на интернет мрежата.
8. Не е поставена подлога од бетон за камионите за ТВ продукциите.
9. Нема водовод и одвод на местото предвидено за ТВ продукциите.
10. Не се поправени протекувањата на вода во делот за работа на медиумите.
11. Не е комплетиран делот за работа на фотографите.
12. Нема телевизори во делот за работа на медиумите.
13. Не се функционални тоалетите во делот за младинските категории.
14. Не се заменети скршените/оштетените столчиња во делот за карти.
15. На ниту едно место стадионот не смее да изгледа како градилиште.
16. Не се направени козметички подобрувања (бојосување) и чистење на внатрешниот дел од стадионот и има уште многу работа во тој дел. Исто и за надворешниот дел на стадионот.
17. Нема споделено комплетен и детален план за евакуација на стадионот.
18. Не е јасно дефиниран оперативен план за персоналот на стадионот
