Маскерано има богат стаж во селекцијата на Аргентина и со 147 настапи само Меси е пред него по број на репрезентативни натпревари.
Има два олимписки златни медали и едно мундијалско финале. Кај момците од кои утре се очекува да го носат сениорскиот дрес и да ја претставуваат земјата на големи натпреварувања, уште на старт наметнал правила кои мора да се почитуваат.
И покрај тоа што дел од работиве се за деца од основно, Хавиер изгледа ништо не сака да остави на случајноста.
- Пишувајте ги домашните задачи на секојдневна основа.
- Мора да научите англиски.
- Во слободно време читајте книги.
- Чистете ги копачките после секој тренинг и натпревар.
- Земете ги вашите сопствени оброци наместо да се потпирате на тоа дека некој друг да ве служи.
- Чистете ги чиниите и приборот после јадење.
- Исчистете ја соблекувалната пред да заминете.
- Посетете работилници за комуникација за да научите како да се справите со медиумите.
„Сите менаџери имаат различни начини на работа. Рафа Бенитез е тотално различен од селекторот на Аргентина Диего Марадона и другите тренери што ги имав. Три и пол години работам со Рафа и сега можам да кажам дека сум подобар играч и подобра личност од кога пристигнав овде“, велеше Маскерано во 2010 година.
Играчката кариера Маскерано ја заврши во 2020-та, а најголемите успеси ги постигна со Барселона каде освои 19 трофеи.
