Пролет е. Преку ноќ, некоја невидлива сила задвижи сè во растенијата и во земјата кои изгледаа мртви, и сега ни следат десетина или повеќе недели кога навидум ниедна друга сила нема да го спречи зеленилото кое преплавува. Изразено во бројки, годишната продукција на биомаса (сè зелено и растително) е далеку, далеку повеќе и неспоредливо поголема од вкупното производство на сè што човек ќе произведе: пластика, метал, и др. (читај „ѓубре“). Јас сум фасциниран од ова тивко производство секоја година. Но за многу други тоа е кошмар. Толку многу непожелни растенија во нивниот двор кој педантно си го планирале, саделе и одржувале!..

Пролет е (за некој ден и официјално). Хоби-градинарите, професионалците и лендскејп-фирмите имаат полни раце работа, за викенд или скоро секој ден. Доста ќе се сади. Некои садат со години, некои со децении. Дали има место за подобрување некаде? Додека читате, можете да се проверите самите себе.

Втора најчеста причина поради која ме ангажираат муштериите е плевење. Веднаш да кажам, не го сакам ич. Но, и тоа мора некој да го прави. Уште потешко и од самото плевење ми паѓа кога гледам дека некаде трудот е бесмислен бидејќи не се прават работите до крај. Ако не се покрие голата земја со некој мулч, џабе плевењето.