Не дека водиме статистика за процентуалната застапеност на различните уметности во рубрикава, но сè почесто имаме потреба виртуелно да се насладуваме на убави архитектонски зданија, бегајќи од нашата урбанистичка реалност. Но, овој објект е повеќе од само градба, тoa е и место за муабет со самите нас. Како на пример кога постирате коментар на Фејсбук, ама посмирено. 

Во 1958. Марк Ротко, руско-американскиот апстрактен експресионист со еврејско потекло, бил ангажиран да направи серија мурали за ресторанот „Четири сезони" во Њујорк - место каде според него доаѓале „најбогатите копилиња од Њујорк за да се нахранат и да се фалат". Ја прифатил понудата од инает, за неговите слики да им го расипат апетитот.