„Нека кажат што сакаат“, им вика Бенјамин Нетанјаху на домаќините на нивната загриженост дека светот може да го означи Израел како агресор поради прекумерната сила која ја користи против Палестинците. Видеото е од 2001 година, Клинтон ги води Американците за кои Нетанјаху вели дека се лесни за маневрирање. Четврт век и стотици илјади мртви подоцна... види го насловот.

Важи за еден од најдобрите рокенрол вокали на сите времиња. Беше во Small Faces и во Humble Pie, подоцна соработуваше со Питер Фремптон, ама веќе кородиран од алкохол. За Кит Ричардс има кажано дека е еден од ретките луѓе со кои сака да разговара. Загина трагично, во домашен пожар во англиското село Аркесден, во Есекс. Во крвта му нашле алкохол, кокаин и валиум. Стив Мериот. 

На Инстаграм и ТикТок ќе најдете колку сакате брзи и едноставни рецепти како да подготвите домашна Нутела која ќе го парира вкусот на оригиналот а ќе биде поздрава и нема да ве здебели. За вкусот нема да расправаме, здрава ќе биде е онолку колку што здрави работи ќе ставите, ама дека ќе црпите полни лажици од домашната а нема да се здебелите, тоа малку потешко.

Прописно маскиран (оти па некој ќе го препознаеше од реднеците), Саша Барон Коен на група локалци од Кингмен, Аризона (35.000 жители) им најавува економски бум и 385 милиони инвестиција во нивното место. Нивниот аплауз брзо замре кога им кажа дека се работи за мега џамија. Кога фатија да се бунат, ги праша, е добро, каква е џамијата од вашите соништа? После призна дека биле спремни некој од присутните да потегне пиштол. 

Иако моќен, продуцентскиот могул Харви Вајнстин беше лесна мета на движењето #MeToo бидејќи цел Холивуд и пошироко знаел за каква џукела се работи и дека ќе легне сè што ќе му налета. Во лавинатa против него се вклучија и обични калаштури жедни за внимание и пари чии случаи лесно паднаа на суд од проста причина: не можеле да опишат што „ги терал“ да му прават онаму долу, бидејќи таму долу, поради гангрена, човекот немал тестиси.   

Кинески Тик-токери и други заебанти наголемо прават зезалици со фиксацијата на Доналд Трамп дека другите земји, главно Кина, ги крадат САД со нефер практики па мора да се направи сè што треба за да се вратат фабриките во Америка и државата односно да се ре-индустријализира. Па ги потсетуваат како тоа ќе изгледа. 

Стара ама безвременски свежа реклама за локален бизнис за продажба на монтажни куќи. Кастинг: газдата и неговата мала чета „inglourious basterds“ кои како да се излезени од Фарго. Искрена, брутална, едноставна, без пренемагања и креирање лажни светови и ветувања. Сето она што стандардните реклами, за жал, не се.  

Дечкото стави парче салама на парче леб и тоа го стави во рамка за да го однесе во музеј и да го закачи помеѓу другите уметнички дела. Мора да е голем мерак е да се гледа како луѓе се собираат пред саламата и ги толкуваат слоевитите и длабоки пораки на уметникот.  

Сиромашните ќе го сакаат она што го имаат богатите, младите ќе сакаат да бидат уважени како старите, жените ќе сакаат да бидат како мажите, странците ќе сакаат права како староседелците, лопови и преваранти ќе сакаат важни државни функции а демократијата ќе им го дозволи сето тоа. А кога таквите демократски ќе ја преземат власта, ќе се роди тиранија полоша од сите други тирании.

Видео кое демонстрира што прави капка виски на колонија од милиони бактериии. Масакр. Ако е така со виски и неговите скромни 40 степени алкохол, тогаш од оние наши 45+ што по правило „ми ги носи човек од Кавадарци, само за свој ќеиф прави“ (а прави 500 литра човекот), бактерииве извршуваат масовно самоубиство штом ќе се отвори шишето.

Какво време доаѓа, наместо „Што раса ти е кучето?“ газдите на кучиња да ги прашуваме „Што ментална дијагноза е твоево?“ Кога пред некое време ги објавивме на некаква улична парада (види: Ова ли се страшните европски „кучиња на војната“?), мислевме дека тоа е врвот на таквиот егзибицонизам. Не бре, имале тие и напревари во дресура. Него, ќе ги кастрираат ли?

Постојат катаљарда дефиниции и начини да се опише тоа суштество. Од неговите биолошки карактеристики па до некои подуховни или карактерни особини. Ваква дефиниција немаме чуено. Дека маж е оној кој една работа никогаш не прави два пати. Никогаш. И дека е незамисливо тоа двапати да го направат алфа мажјаци од калиброт на Џон Вејн или Џемс Бонд.   

Незаборавно запознавање на професор по квантна физика со своите студенти. Има лоша и добра вест за нив. Лошата е што тој предмет не може интуитивно да се разбере. Добрата е што, во суштина, никој не го разбира, само што тие, во тој момент, не го знаат тоа. Во тој момент, само тој не ја разбира квантната физика. Негова задача е за една недела студентите да го стигнат. Јак шармер.

Мастер клас по трговски и увозни тарифи на иконата на Републиканската партија, Роналд Реган. На почетокот тоа изгледа како патриотска работа која ги штити домашните производи и работни места. А потоа работите почнуваат да се урушуваат, на големо. И не завршува тоа на добро.

Одвреме- навреме, на сајтов оставаме по некое импресивно парче кое е репрезентативно за тоа до каде стигната вештачката интелигенција до датумот на објавувањето. Тоа го правиме чисто за после неколку години, да се чудиме на какви баналности некогаш сме се чуделе. А дотогаш, до толку ќе збудалиме од мешањето на реалностите, што ни на одразот во огледалото нема да му веруваме.  

Комедијата и хуморот се врвни модалитети на човечкиот дух. Способноста да се види една банална работа од сосема друг и неочекуван агол бара талент, осет за тајминг, испорака.... Обично вицот има еден панчлајн. Овде тие самите се редат бидејќи сетапот е одлично поставен. Еве пред да ја погледнете точката, поставете си го истото прашање од насловот и видете дали ќе ви дојде...    

Новинари го начекуваат Бил Бур и се обидуваат да изнудат некоја контроверзна изјава за да имаат наслов и да собираат кликови. Не е тој од вчера. Им вика дека едвај школо има завршено, дека не гледа вести туку скрола по Инстаграм, главно мотори и хиени. Ги поучи и дека не треба да прашуваат комичари (Што е следно, ќе ме прашате за Блискиот исток?) и само да пренесуваат изјави туку да се сетат дека се новинари и да си ги вратат јајцата. Што сега ги немаат.

Фина зезанција за тоа како префинети чувства за препознавање работи може различно да се користат. На почетокот е жена која го препознава парфемот по „кликот“ кој го прави капачето на шишето. А потоа жена која совршено го користи своето истенчено чувство за мирис. Само, овојпат не се работи за парфеми.

Савина Јанату е позната грчка пејачка со повеќедецениска кариера која има нов албум (со групата Примавера Салоника и долгогодишната соработничка Ламиа од Тунис). „Савина знае да нè транспортира преку векови и држави“, пишува Гардијан за албумот "Watersong", инспириран од водата како мелем и како проклетство. Јанату нè транспортира од Ирска до Ирак, од Корзика до Калабрија, од Македонија до Македонија.

Американскиот претседател Доналд Трамп објави дека Марк Брновиќ, адвокат, ветеран и поранешен јавен обвинител на Аризона (Американец со српско потекло и член на Републиканската партија)  е избран за нов американски амбасадор во Србија. Доаѓа на местото на Кристофер Хил, кој своевремено беше амбасадор и во Македонија. Наместо да ви го претставуваме Брновиќ, да оставиме тој самиот да се претстави.

Најбогатиот музичар на светот е побогат од Бијонсе, Боно или Дилан и патем, ги има освоено сите музички награди што може да се освојат, од Греми до Тони. Зад него е повеќе од полувековна музичка кариера па сепак, многумина можеби и немаат слушнато за него.

Јутјуб каналот Red Pill Bunny концизно ги поврзал точките за вистинските мисии за контрола и влијание на неодамна укинатата американската агенција за развој. Од силните нетранспарентно потрошени милијарди до извозот на франшизата наречена Шарена револуција. Послe Маск и ДОГЕ е лесно да се мудрува, но останува мистерија како Американците толку долго не беа свесни за ништо од ова.   

Ако некому е полесно, Заев и таа тајфа не се единствените кои со брусилки сакаа да ги избришат знаците на сопствената историја и сеќавања, па се стругаа шахти (за да им удоволиме на Грците)  и споменици од НОБ (за да им удоволиме на Бугарите). И во Литванија се брусат шахти од знаците на СССР, или да се подзаборави нивниот доброволен колаборационизам со нацистите.

Кога ќе прашаат луѓе на анкети, сите се за мир во светот, сите се хранат здраво, сите редовно вежбааат, пропуштаат пешаци на пешачки, го вадат белото од мортаделата заради холестерол... Слично е и со верата. На такви истражувања, испаѓа дека 22% Американци редовно одат во црква или друг верски храм. Следи им го ГПС-от на мобилните, ги има само 5 посто.