18 минути супер забава меѓу двајца другари. При што Рики е само спотер а главен јунак е Карл (Idiot Abroad), дечкото со најмаалски став во животот.

Екстремно добро изведена "скриена камера": Се возиш сам во лифт, снемува струја, по некое време доаѓа но од никаде се појавува бледо девојче кое држи кукла. Па и вриска. Ок, прашањето е, како овие лудаци што смислуваат вакви финти не се сигурни дека некој од уплашените не носи пиштол?

Дел од шармот и популарноста на словенечкиот филозоф Славој Жижек се должи на неговиот нетипичен академски пристап при што често флертува со актуелни културолошки феномени. Ама, некогаш и нема што паметно да каже. Овојпат на тема зошто Гангнам (Fuck them stupid Koreans) го победи Џастин Бибер (Disgusting guy from Canada). Добро, на кокаин ли е мудрецот?

Откако стрејтерите возвратија на најавите дека хомосексуалците ќе им ги лапнат девојките, рековме дека топката е кај хомосексуалците. И, топката ја преземаат лезбејките кои на другиве девојки им викаат дека ќе им ги лапнат дечковците. Добро, фино сè тоа, ама, како одеднаш главна финта станува сексот од инает?

Од Австралија е. Професионално дига тегови заради стекнување право на мускули. Доби престижна награда на светското првенство во Даблин. Сè е тоа фино, само малку боде очи тоа што Керолајн тврди дека е женско. А изгледа како на Урко да му ставите прслук.

Поентата на клипов е што двајцава венчални гулапчиња абер немаат како да се напијат со прекрстени раце. Ама автентичноста на ликовите, тишината и отсуството на каква било трага дека ова им е најсреќен ден во животот го прави клипов повреден од сите дела на Кустурица. Добро, можеби претеруваме, ама стварно се прекрасни во целото тоа тивко неснаоѓање.

Британските херои на комедијата се луѓе кои сакаат животот да биде подобар и на кои животот им се има посрано од страшна височина и чие чувство за достоинство е постојано компромитирано од разочарувањата што им ги приредува светот, објаснува Стивен Фрај.

Вака започна: гејевите (колку глуп збор) снимија спотче во кое на стрејтерите им се "заканија" дека со оглед на тоа што не им се дозволуваат геј бракови, можеби ќе почнат да се венчаат со нивните девојки. Стрејтерите изгледа не ги фати паника од оваа идеја, па возвратија со контра спотче во кое ги охрабруваат да ја остварат заканата. Топката е кај хомосексуалците.

Подобар тајминг на сцена не сте виделе уште од моментот кога се залапаа Мадона и Бритни Спирс. Извежбано до крај, забавно до бескрај.

Откако на живо имаме изгледано десетици и десетици возрасни луѓе со исто вакво однесување, бебушов доаѓа како интермецо. Ем, на него му се простува.

На црниот Џаспер пар медицински институти примениле нова, уникатна терапија за регенерирање клетки од р'бетниот столб кој му бил повреден. И просто убаво е да се гледа како малиот се опоравува.

Фини овакви видеа, во кои ти е јасно како ќе заврши работата. Имаш брод кој тргнува под еден мост и апла се гледа дека нема шанси да се протне под него. А тој упорен.

"Не можам да замислам како би ми изгледал животот без деца? Не можам? Па јас само и тоа го правам, фантазирам како би ми изгледал животот без нив!" За да се превенира секоја претерана романтика, овој клип треба да се пушта пред секоја родителска средба. Делот со опијатите да им се пушта само на најхрабрите. Луи е махер над махерите!

Емили се занимава со модниот свет и пишува за нас а Карло Бос оди на работа "кога ќе му се дигне", но, не пројдоа така лесно баш сите нашинци кои се најдоа на работа во Италија. Ви го претставуваме Даниел Јовановски од село Блатец Виничко, познат како Кепачо.

Две плавуши, Даниела Т. и Емилија Л., решаваат да ја прекинат долгогодишната тиранија на поп и рок и панк и техно музиката. "Од денеска па натаму фолкот е во мода!" - заповеднo проповедаат преслатките Дани & Ема во една од најангажираните песни што досега сте ги чуле. Баклава, шпагети, таблети? Џони Штулиќ со факинг труба!

"Да донесеме малку топлина, малку светлина и малку насмевки во Норвешка". Под ова мото се одвива една благородна африканска иницијатива за збирање радијатори за напатената скандинавска земја. Имаат и песна со сите нишани, цареви! Штета што кај нас идејата нема да земем замав, бидејќи дал, не дал радијатор, ќе си плаќаш на оние хохштаплери.

Песната и спотот се дело на бендот, а mastering на аудиото изработил познатиот sound engineer Симон Хејворт (Ennio Morricone, George Harrison, Depeche Мode...)

Ситуација како од легендарен вестерн двобој. Од една страна, таа... со автомобил наоѓа гаража. Од друга страна гаражата, со пакосно поставена угорница (која после некое време нормално станува удолница). Напнатоста постепено кулминира. Пали!

Gawker забалежува дека годината (1984.) кога ова видео парче не ги доби сите можни ТВ награди е година од која сите ТВ награди станаа неважни и беспредметни.

Приказната за Израел и Палестина, и за сите што мислат дека нешто е вечно или дека нешто може да се реши еднаш засекогаш. Почнува одамна...

Линкот за ова аметерско филмче го испраќа еден читател Албанец, со добра поента. Филмчето забавно, за двајца Холанѓани кои решаваат да одат на одмор во Албанија и налетуваат на селото Лазарат, цело насадено со ганџа. Ах, да, поентата: "Мислам дека ќе ги убеди луѓето дека не вреди да одат на одмор во Грција" :)

Како ви звучи идејата да ги слушнете LCD Soundsystem и Miles Davis? Пазете, ни монтажа ни ништо. Само пуштање на две нивни песни истовремено. И си легнуваат перфектно, како босилек на патлиџан.

Еве колку е компликувано некој да го отвори вашиот куфер, да се послужи и пак да го врати во првобитна состојба, без разлика колку катанци имате на него.

Знаете она кога ќе го земете сунѓерчето и ќе ги минете чевлите и мислите дека сте завршиле работа и сте ги исчистиле? Епа врска нема. Бонус: како се прават Луј Витон чевли.