Џими Кимел решава на улица да ја тестира веста од пред некој ден дека децата не знаат да гледаат на часовник со стрелки затоа што сè околу нив е со дигитални часовници, па не им ни дошло да се потрудат да ја совладаат логиката околу стрелките.

Ни на Карлсон не му се верува колку лесно се шеба оваа персона. Си ја начека како маскота и сега за свашта ја вика, а рубриката ја потпишува како „Либералниот шерпас“. Лујката прифаќа па промовира онакви „out of space“ идеи заради кои на многумина нормални им збоктиса сиот тој блок и за инает гласааа за Доналд Дамб. Шерпасот бара на факултетите да има кабини за плачење, за да можат снегулките низ солзи да го излијат стресот од себе. 

Исповед на Кевин Смит кај Колбер за тоа како доживеал срцев удар. Со најмашка реакција на свет: преживуваш масивен инфаркт, те носат во болница а таму те фаќа срам и едно незгодно што треба да се соблечеш пред непознати луѓе.

Помалку болно за луѓе од трчањето низ Памплона (веројатно), помалку смртоносно за бикови од корида - ползење со бикови.

Мета-предавање за сите оние предавања кога човек  оддава впечаток дека господари со темата, тотално знае што зборува, па ќе пушти слајд, па ќе направи мала шала.... Дечково ептен, ама ептен добро, ги скинал сите цаки (сосе пиењето вода и погледнување во часовник) на таквите мотивациони говоранции. Многу корисно и пресмешно.

Авторот (Дејвид Браун) вика: Ова е најамбициозниот проект за едитирање на кој сум се нафатил и за кој ми беа потребни 4 месеци. Се започна како љубопитност а заврши со миксање и полирање на 250 видео-аудио сегменти во еден (саат ипол) клип.

Конзервативците често знаат да дрват со својата сериозност но дури и перјаница од нивните редови каков што е Такер Карлсон станува шармантен заебант кога ќе му се напенали една ваква „либералка“ (жива греота е какви замлати го контаминираа тој поим). А таа се дала во битка да го исчисти англискиот јазик од зборот „MAN“ кој бил навредлив за нивната тоталитарна секта. А МАНчестер? А ГолдМАН сакс? „Ах, не одам јас во шопинг во Голдман“. ќе каже интелектуалката.     

Репортажа од првомајската парада на плоштадот Маршал Тито во Скопје: Изминаа десетлетија во костец со огнот... како што само рацете можат, рацете на милиони и милиони во окната и леарниците.

Сè тоа со бременост и дете и слично е убаво, само веројатно убавото се намалува кога жена ти по 4-ти пат ќе ти остави во кујна позитивен тест за бременост. И тоа не само што се намалува, туку се претвора во комплетна паника и избезуменост, а помош ти нема. Има блицови надеж, ама ништо повеќе од тоа.

Дечкото решил да испече кременадла и тоа да го пренесува во живо на интернет. И почнуваат да му мрчат: ја препекол, ја исушил.... А тој гори побрзо од кременадлата.

Супер шармантен спот за регрутација на нови лица во полицијата на Нов Зеланд. Чудна некоја земја е тоа. Триста работи кажаа, партиска книшка не спомнаа.

Малку поглед во онаа Англија која не е чај во пет, дрвење за времето и бескрајни извинувања за сè и сешто. Ништо крикет, Кебриџ, Оксфорд. Овде се заебани гости и уште позаебани газди, дрољи, пијандури, дебели стриптизети и сличен прекрасен полусвет. Овде се нашите.

Малку промена од оние наши пејачки работници кои досега имаат песни комада еден, на утринска емисија ја навуваат песната број два а за соработниците со кои ја правеле, мртви-озбилни викаат: „Екипата која победува не се менува!“ И уште ќе речат дека не сакаат да откриваат сè, колку сите нас да нè убие огромна неизвесност. Ете, Битлси беа малку поинакви: отворени, луцидни, забавни, заебантски расположени и авто-иронични. Ама што знаеле тие...  

Тотални генијалци се овие од Bad Lip Reading. Тотални. Го имаат исчашено испрашувањето на Закерберг толку добро, да ти е криво што светов не е таков каков што може да биде.

Веќе оштетена од алкохол, цурава решава дека на неа и другарките им треба уште по една тура. Па нарачува четири самбуки (италијанска мастика/узо). Статива.

Астронаутот Крис Хедфилд стана познат по оние кул видевца што ни ги праќаше додека беше пожарен кај сошките на Меѓународната вселенска станица. Овојпат на многу разумен и разбирлив јазик зборува за некои од најраширените митови поврзани со неговата работа. Остајте нè нас што сме издвоиле за наслов (такви се нашите хоризонти), изгледајте го целото парче кое е ем интересно ем корисно.

Многу луѓе од многу земји откриваат како препознаваат нивен сонародник во интернационални друштва. Спојлер: нас нè нема. Штета, а баш не занимаше што би можело да биде.

Се наоѓа на планина во Непал, и атракцијата е што се возиш по пат кој постојано е поплавен од вода од водопадот над што е над него. И сето тоа покрај провалија. И на удолница.

На руска телевизија од советско време (годината е 1972) на младината им се објаснува Ози Озборн и Блек Сабат. За таканаречениот рок колектив Чорни Шабаш се вели дека „проповедаат насилство и религиозно мракобесие“ (?!) а солистот Ози Озборн го залупаа како „класичен пример за нарушено психичко здравје“. 

Многу е лесно, не се што ќе видите спакувано како видео е точно, има и такви што лажат или па не се доволно информирани или па и двете. Нормално има поштени и објективни. Само треба да бидеш претпазлив во што веруваш и со какви линкови ги замараш блиските, вклучително и ова видео.

Кинези тестираат систем кој треба да ги научи пешаците да поминуваат на семафор. Штом некој тргне на црвено, го шприца со вода. Хмм. Кај нас одма ќе извадат муабет дека тие ступчињата пуштаат кемтреилс.

Дечкото даде сè од себе да ни објасни како тоа се прави. А ние дадовме сè од себе да го разбереме. И ете нè, него и нас, после видеото, пак секој по својот пат.

Американски сопственици на стан / куќа, влегуваат во својот објект некое време откако им го снемува кираџијата. Не е мртов, само не знаат дали е во болница или на некаков, каков било, вид лечење.