Иако имаат бушави капи, иако веќе се станати неизбежен дел од идентитетот на Лондон и Британија, иако изгледаат малку смешно, клучно што не треба да се заборави околу британската кралска гарда е дека тоа сепак е гарда и како таква е составена од активни војници на британската војска.

Острата и секогаш незгодна Џенис Фиаменго (професорка од Отава, прокламирана анти-феминистка) ја распретува фамата околу новиот Кристина Блази Форд, жената која сведочеше против трамповиот предлог за врховен судија Брет (и тебе сам сит) Кавано. Вели, за да се разбере новата хероина на Хилари Клинтон, треба да се разбере културното милје од кое доаѓа и универзитетот на кој предава: елитниот Пало Алто (23.000 долари годишно), на чија скала на вредности, социјалната правда доаѓа пред квалитетниот научен труд.

Човеков има два проблема со целата приказна. Прво, тврдењето на аукциската куќа Сотби дека сликата е од човек кој лично ја добил од Банкси во 2006 и дека целиот механизам, сосе батерии, 12 години лежи така затворен. Втор проблем е поставеноста на ножевите на секачот за така да ја исечат сликата. Овие дупки во приказната важат само ако Банкси немал пристап до сликата од 2006-та до неодамнешната аукција и ако секачот од видеото навистина е употребен.

Петмина завршени студенти на музичкиот конзерваториум во Прага, за бисот на нивниот дипломски концерт, решаваат да изведат тема од Том и Џери. Синхронизирана со цртаниот.

Затворената средина во која живеат, конкуренцијата и желбата за малку внимание и храна, ги натерало овие мечки регуларно да прават мајмуни од себе. Секоја асоцијација на "Балканот и ЕУ" е... сосема разбирлива.

Ќе го имате клучот на универзумот ако успеете да убедите некого да го изгледа следново видео кое открива дека големата тајна на универзумот е во бројките 3, 6 и 9. Ама ферски, до крај да се гледа, инаку не фаќа клучот. 

За да разбере некои работи на истокот, запад можеби треба да се „врати на школска табла“ и да почне, да речеме, со Питерсон. Канадскиот професор ги објаснува суштинските разлики во поимањето на христијанството. За едните Исус е оној кој со својот живот се искупи за човечките гревови. За другите, човек треба самиот да го земе својот крст и да го носи по ридот.„Со крстот напред“, „секој со својот крст“, ви текнува?

Едно 12-13 години има од овој каноник. И сè уште секоја заповед (која е поврзана со човекот а не со технологијата) е актуелна и важечка.

Лиоз Шем Тов е реалист (демек обратно од илузионист) од Израел. Тој не само што ќе ви ги покаже своите ментални супер-моќи туку ќе ги разбуди и вашите. 

Како Господ никој не е. Освен можеби мотор кој шиба накај тебе и нема шанси да спасиш глава ако не рипнеш од инвалидска количка.

Двотретинското мнозинство во колата решило да слуша една песна (Come on Eileen, од Dexy's Mindnight Runners). Останатата третина, баш пред рефренот, пука и веќе не може да додржи.

Нема двајца луѓе кои во своите политички погледи се подалеку еден од друг од овие двајца. Па сепак, едниот вика непријателски политичар, другиот оди кај непријателски новинар. На Бенон му е криво што Сандерс немал доволно енергија и борбеност како Трамп за да победи кај Демократите па на сцената да се тепаат лев и десен популизам. Мар тврди дека Бенон намерно наоѓа идиоти како Сара Палин и Трамп, бидејќи се празни шасии кои тој ги полни со негови идеи.

Дечкото се намести, трпеливо  почека да му дојде текстот за пеење и - победа! Наравоучение: кога не те бива за нешто, најпаметно е да го избереш она што најмалку те резили. 

Легендата вели дека на денот кога испушташе душа (24 ноември 1991), Фреди Меркјури го има посетено небесен пратеник со непристоен предлог: ќе му го продолжи животот ако успее до крај да ислуша една негова песна. Фреди се израдувал. Фреди беше наивен.

Еве прво нека се произнесе компилацијава луѓе од видеово, а потоа збор ќе имаш ти со твојата неиздржлива компилација од меил што го игнорираш, 6-ти состанок во денот, пропуштен повик од клиент на кој не сакаш да му се јавиш и недовршениот ексел што ти ја црпи цела сила.

Човекот кој го прогласивме за наш Буда, господар на здравиот разум, шаолин мајстор на способноста ништо да не може да те одушеви, Карл Пилкингтон, има ново шоу и сега шета малку по телевизии да го рекламира. „Sales“ поентата му е генијално искрена: ако ви се свиѓаше она што досега го правев, ова новово нема да ви се свиѓа.

Задоцнета но праведна одмазда за сите истурени пијачки, флекосани алишта, недолжни камчиња и дебело превиткани картончиња. Ако за ова ни требаше толку време, колку ќе ни треба за ракот?

Ги има во сите големини, форми и лоши табиети, и тоа доволно лоши табиети за кинеската влада да се загрижи како тоа нејзините луѓе се однесуваат надвор од земјата. И овој пат кинеската влада не претерува.

Прво: бракот е како лотарија, па веројатно нема да добиеш. Ама ако добиеш тоа е толку добро што само за тоа вреди да се проба. Второ: 50% од браковите завршуваат со развод, ако ти кажам дека надвор има  50% шанси да паѓаат метални кугли, ти ќе останеш дома, нема да стапнеш надвор. Трето: да купиш куќа ќе ти дадат 50 формулари што треба да ги пополниш, што ти објаснуваат сè... кога влегуваш во брак не добиваш ни едно ливче, ни летка на која пишува „само што ја направи законски најважната работа во твојот живот.“ Има уште.

Група од 50 рандом луѓе испречени пред една од големите непознатици на „пакувано на парче“ културата: како да исечеш лубеница на триаголници. За исполнување на потфатот имаат отприлика доволно алат за од балван да направат кауч на отварање.

На ТЕД веќе може да се сретнат секакви будалаштини (пред извесно време една цура објаснуваше дека педофилијата е сосема легитимна сексуална ориентација), но на таа платформа уште може да се најдат драгоцени и инспиративни погледи. Овојпат, нобеловецот Даниел Кенеман, автор на книгата „Мислење, брзо и бавно“, за загатката меѓу искуството и сеќавањата. 

Ако нешто може да се научи од видеово тоа е дека под итно треба да се основа невладина организација, кризна група, советувалиште и засолниште за ранливата група на тинејџери криминалци претепани од 83-годишни пензионери. А ако не казна, пензионерот треба да мине барем темелна наобразба за маките на денешната младина соочена со вечната неправдина на пакосното зло познато како „животот не е како што ти си го замислуваш на 18 години“, по што како што е ред ќе следуваат семинари за градење доверба и разбирање меѓу двете страни.

Дечково си дава за задача да имитира 28 глобално познати комичари и на спектакуларен начин успева да ги утне сите до еден и притоа фантастично да ги скине.

Том Вејтс е во нова песна првпат после две години. Му гостува на својот дологодишен соработник, гитаристот Марк Рибо, кој неодамна имаше баш убав концерт во Скопје. Ја плетат старата добра химна на италијанските партизани „Бела чао“, онаа која малку ни ја огадија фејкерите кои со неа на своите медени усни го крчеа својот пат кон државното ухлебување. За среќа, можеме да бидеме сигурни дека Вејтс и Рибо не го прават ова за да бидат пиарџии во новиот состав на Белата куќа.