Самсунг во соработка со Лео и Барнет и аргентинската компанија Ингематика направија згодна и многу корисна алатка која решава многу честа и опасна дилема, кога имаш огромен камион пред себе и не знаеш што се случува напред, дали да тргнеш да го претицаш или ќе те здроби некој од чело..

Сајтов е наменет за една многу посебна група на луѓе со еден многу конкретен фетиш на патики, со бескрајно педантен пристап, ментално индексирање и детално познавање на секој можен модел на патики. Не е за верување дека постојат такви луѓе, се додека не ги запознаеш. Може да ти заличат на секта, ама безопасни се.

Уште не успеавме да изустивме "Што ли ќе биде следно после 3Д принтањето?" а следното веќе дојде и изгледа лудница. Како оној течниот злотвор од Терминатор! Е сега стварно, што ли може да биде следно?

Од сè што може да се испечати во 3Д, Холанѓаните одлучија да испечатат цел функционален мост во Амстердам. Печатењето треба да почне во септември, a роботите сами треба да ја звршат целата работа и без дополнителна градежна асистенција од луѓе да ги спојат двата брега на реката. Печатењето ќе биде со метал кој роботите на лице место го загреваат до 1.500 Целзиусови степени и ќе го калемат на мостот. По иста основа, роботот / печатач MX3D ќе може да отпечати било што од железо.

Ветувањето е дека ова е најдосадното вирално видео на светот. Од тебе зависи дали ова ќе го претвориш во најкорисното видео на сите времиња. И како ретко кога, тука стварно можеш на некого да му помогнеш со шерување.

Разгледај малку меѓу видеата на сајтов и ќе видиш изобилие од монтажи и миксови на најразлични теми. Ова што сега имаме да ви го преставиме е сосема ново ниво на монтажа. Дело е на Џоб Вилинс и е за академски цели. Џоб во овие цели го зема филмот Вонземјанин, го спојува со филмот Прометеј (приквел на првиот), и го добива филмот "Derelict" (траење: 2 часа и 29 минути). За филмовите подобро да се вклопат, производот е во црно-бело.

Уште од старт дисквалификувајќи ја нашата држава од каква било конкуренција нa темава (геврек???), собравме неколку мајстори од по свет што имаат достигнато Мајкл Џордан ниво на вештина во својата работа, и Џеј Лено вештина во тинтрање муштерии.

Младите и многу надежни актери, Бен Афлек и Мет Дејмон, во средината на 90-те го имаат едно од најитересните сценарија што го посакува речиси секое студио во Холивуд. Го добива Харви Вајнстајн.

Една од поубавите работи што може да ти се случи после 15 години на интернет, е да изгледаш видео за некој производ и да се почувствуваш како Индијанец што прв пат гледа огледалце во рацете на Колумбо.

Она збори за љубов, он се тепа за фудбал, двајцата се дел од видеото за годинешниот натпревар во Калчо Сторико, оригиналната крвава верзија на фудбал, која се уште се игра во Фиренца секоја година во 3-та седмица од јуни.

Моментално натпреварот е како да бидеш понавреден, а во исто време и почувствителен на што и да ти кажат или што и да се чувства околу тебе, без притоа задолжително да разбираш за што и како си навреден или се случува.

Тоа што човекот го вика Франкенстек, во основа е големо парче говедско месо (по површина) на кое со лепак за месо, Transglutaminase, му се залепени помали парчиња месо (нешто како да споиш ражнич со вешалица и да го продаваш како бифтек). Идејата на видеото не е да се промовира лепакот, туку да се покаже една од опциите како се добиваат евтини порции стек.

Едно од најмрачните видеа за Втората светска војна, базирано чисто на статистики и бројки, без да видите ниту капка крв. Крајна бројка за војната за цел свет - 70 милиони луѓе. Еве како е стигнато до таа бројка.

Ремикс - комбинирање или монтирање постојни материјали за да се создаде нешто ново. Не се работи за крадење, се работи за влијание. Не се работи за музика, се работи за сè.

Едниот е премиер на Австралија, другиот е главен на опозицијата, а тој што е различен е новинар.
- Се боревме и успеавме да се вратиме со рејтинзи и сега сме на ниво со опозицијата.
- А како би ја опишал опозицијата?
- Како комплетен распад, со докажано минато на некомпетентност, и за тоа не се влада.
- Извини, чекај малку, се боревте за да бидете на исто ниво со некомпетентен распад?

Од очајот на откажаниот авионски лет, сред чекалиштето кое немилосрдно го забавува секој следен момент, се издига дуел на два тешкаши - екипата на бродвејската претстава Кралот Лав, наспроти екипата од бродвејската претстава Аладин. Па каже...

Тоа што Сири и Гугл Нау сакаа да го постигнат, го постигнува видеово. "Видеово" затоа што ова е прво појавување на концептот, изгледа премногу добро за да е вистина и делумно од љубомора што не можеме да го пробаме. Апликацијата се вика Хаунд (Hound) и автор е компанијата зад СаундХаунд. Функционира исто како колегата од карши, што цел ден го дрвите со секакви прашања, а она па запнал да ви одговара.

Клучен прв чекор во отстранување на какво било осило е да се замае колонијата и осите да бидат што е можно помрзоволни. Потоа ја чистиш слој по слој. Единствен отпор има кога ќе дојде ред да ја собереш матицата. Важно е ништо од ова да не правиш сам, туку да најдеш луѓе што знаат што прават. Во конкретниов случај мајсторот е од село во Западен Бенгал.

Едни што го изгледаа клипот се фатија за тоа колку е добро снимено видеото, па уште подобро и монтирано. Другите го форсираа текстот, затоа што те тера да се вдлабочиш во видеото и му дава логика. Аргументот на третите беше - вие глуви сте? Инаку, комплетот е разгледница за многуте ликови на Токио.

Белгија во кој било дел од последниве 25 години да ги имаше нашите соседи и нашето место, до сега ќе беше распадната, прежалена и заборавена. За нејзина среќа, се наоѓа кај што се наоѓа, и има разбрани соседи како Холандија, Франција и Германија, па може да си дозволи да се однесува како Белгија.

Не работата "ви реков," ама Џон Оливер многу аргументирано ја збореше ФИФА и криминалите околу неа уште ланското лето. Ова е апдејтот по минатонеделното апсење на функционерите.

Германците имаат многу што да забележат на видеово (инаку Германско, на ЗДФ, за грчкото барање за репарации од Втората светска војна), ние имаме далеку повеќе што да забележиме кога Грци зборуваат за жртвата на деца протерани од својот дом. Ама и првото и второто не го олеснуваат страдањето што третите го минале.

Еден од најинтензивните мотивациски говори на интернетов, во изведба на дечкото од сликата. Може да се аплицира за што и да ви треба куражење, а може да го искористите и кога некој од околината ви е кенкав околу нешто. Ем доволно е краток за да го изгледате.