Мелусина се омажила за смртник, Рејмонд од Поату, под услов никогаш да не ѝ ја види трансформацијата. Сепак, како што налага човечката природа, љубопитноста го победува и ќе ја ѕирне за време на преобразбата. Мелусина станува очајна што ѝ се знае тајната и бега, зад себе оставајќи лоза која засекогаш ќе биде означена од нејзиното наследство.
И покрај предавството, приказната на Мелусина е приказна за истрајност и магија. И во словенската митологија и бајки ги среќаваме елементите - на самовилата ѝ го крадат фустанот и бега, или на девојката што се претвора во жаба и ја одземаат оставената жабја кожа, па и таа бега. Главниот виновник за бегањето е потоа осуден да ја бара и да оди на патување полно искушенија за да ја врати назад.
За Мелусина се вели дека основала благороднички домови и утврдени градови со нејзината моќ, за добросостојбата на нејзините потомци, но клетвата била секогаш присутна, долго после неа, како потсетник на нејзината двојна природа и последиците од прекршените ветувања.
Мелусина е денес симбол на скриени длабочини, женска моќ и комплексноста на меѓучовечките односи во фолклорот.