Видеото е снимано во еден ден, почнуваат во 7 часот, завршуваат во 17 часот, во 12 имаат еден час пауза за ручек. Предизвикот е: да се направи штала. Затоа што се Амиши, нормално нема ништо од алат на струја. Три, четири, старт!

Луѓето никако да ја сфатат оваа порака од биковите. Дека не се волови.

Извадок од холандски документарец од 1972-ра од егзотичните краишта на Европа, во кои се случува еден бајковит хепиенд по векови војни, насилства и балканштини.

Дај да видиме како освртот на кралската свадба беше направен без да се спомне расизам и слични сегменти, и наместо тоа да се вози на чистокрвно британско нетрпение кон кралското семејство.

Нормално дека не го знаете. Немаше ни ние да го знаеме ако не се познаваме со наши луѓе кои во Америка копаат по продавници за стари плочи.

Мислиш дека ти имаш нервози што луѓе го викаат она штипскиот леб со месо „пастрмајлија“, па ќе го видиш овој изнапатен јапонски народ како мора со децении да трпи Американци да им го сквернават поимот за суши низ светов.

Во едниот табор се Стивен Фрај и Џордан Питерсон. Во другиот табор и да не знаете кои се, ќе гледате заради овие двајца. Или затоа што ги почитувате како нас, или затоа што не можете да ги поднесете зашто ги почитуваат луѓе како нас. Ете како ви отидоа два саата.

Целта на документарец за природа најчесто е да биде крајно поучен (со исклучок кога намерата му е да биде искористен за некои крајно неразумни лични агенди). А зошто па да не биде малку помалку поучен и неспоредливо позабавен, само со помош апдејтувана нарација.

Како што објаснува научникот од Кембриџ не треба да го бркаш бројот на калории што си ги внел. Она што е важно е „калоричната достапност“ односно колку калории од одредена храна се апсорбираат во твоето тело.

Оригиналот е од пред 17 години и во тоа време беше сериозен технички исчекор, а и визуелен. Ни крив ни должен ИксПе во следните 10 години беше водечки оперативен систем, додека Микрософт размислуваше што ќе прави со себе. Камер Кан Авдан прави дизајнерски римејк на оперативниот систем и го шминка за 2018.

Титулата „најголем“ Јиву интернешн трејд маркет ја добива со 8 километри ходници за шпартање и над 75.000 продавници од кои секоја претставува некоја фабрика од Кина. Видеото е посветено на продавачите од трговскиот. Нешто како шопинг-мол „Барака“.

Наше е да ви кажеме дека секоја од овие домино плочки претставува 1 милион години. Останатото ќе ви го каже човекот кој за видеово нареди 300 метри домино плочки.

Имаше еден виц за цреп дрвосеча кој сфатил дека е послаб од колегите само затоа што за разлика од него, овие ја палеле пилата. Ама овој е екстра цреп. Дури и кога му ја запалија машинката, продолжи да мава.

Викенд проектот опфаќа корнење на асфалтот на 6 ленти, корнење ограда, копање дупка, да го „извозиш“ тунелот на место, да ја покриеш дупката, да тампонираш, да го вратиш автопатот во почетна позиција и пред понеделник да биде во возна состојба. Три-четири сега.

Дербито овој пат одиграно од тимови составени исклучиво од Норвежани, и тоа добро најадени Норвежани што после оброк дрмнаа по една чашка ултра-силен лаксатив.

Француско семејство на тура низ сафари парк, а притоа наштелувани како да се во Дизниленд. Од муабетот во клипот разбравме само „Oh my god,“ „What the fuck,“ и „Jesus“, и ние отприлика сме на ист памет. П.С. тие што ќе ги видите се оригинал гепарди, ниту дресирани, ниту на апчиња за смирување.

Се работи за Атлас, истиот робот што скокаше пред некое време, чиј контролен систем го координира движењето на рацете, торзото и нозете „за да постигне мобилна манипулација“ на целото тело. Терминатор лајкс дис.

Симон Гирц е инженер и една од најфантастичните појави на Јутјуб, каде најчесто ги презентира своите никако употребливи роботизирани изуми од типот шлем за миење заби, кој не функционира, или аларм за будење со шамарање, кој технички функционира. Симон има цела филозофија зад потребата од бескорисност.

Поглаварот на римокатоличката црква го теши малиот кој се расплака сакајќи да го праша дали неговиот татко е во рајот, а бил атеист. Одговорот на Франциско не е боговски, туку уште поголем - човечки е. И стварно, дали оние задрти верници мислат дека големиот Креатор би му замерал на некој кој не бил верник, ама па создал ваков син?

Кинеска осигурителна компанија има понуда за пакет за здравствена заштита чија цена е директно врзана со твојот смартфон: ако смартфонот регистрира дека си направил 10.000 чекори на ден (околу 8 километри), добиваш попуст на осигурување. Тука некаде Кинезите се пуштаат во размислување и толку беше од непробојноста на понудата.

Само еден ден во годината луѓето од народот Догон имаат право да ловат риба во светите води на езерото Антого. Вака масовна сцена немате видено од Господар на прстените. Како се залетаа, мислиш крст ќе фаќаат.

Убава видео ретроспектива на главните женски ликови кои се појавиле во западната уметност во последните 500 години. Отприлика секој попознат женески портрет, од Да Винчи до Пикасо.

„Кога би било коцкасто и кога не би се тркалало...“ Отприлика во истите рамки и денес се движат сите обиди за воведување на нешто ново. Милион забелешки и уште толку мрчатори.

Ова е едно од оние видеа кои ти ги пуштаат на меил со порака: „Објавете ова сите да видат и конечно да отворат очи“. Го пуштаме пошто ни е супер таа замисла, веќе утре одиме по улица,  а оно сите околу нас, со отворени очи.