Трамп за Американците не е ништо ново, ново е само што полека престанува да им е смешен и наместо тоа полека почнува да им станува страв од можниот исход на изборите во ноември. Џон Милејни има еден постар скеч со Трамп, кој на негова жалост никако да изгуби од актуелност и точност.

На потегот ДМ - Перо - Чамо (дебармаалскиот бермудски триаголник во кој потонале многу храбри олупини), овој клип се раскажува како доказ дека рајот е сепак можен на Земјава.

Статлер и Валдорф, или кај нас "оние старците од балконот на Мапетси," во нивните најдобри моменти.

Многу забавна и досетлива точка од шоуто "Америка има талент." Дечкото има и талент и вештина и креативност... Да им се радуваш на вакви луѓе.

Ако сте со нежен стомак или образ, топло препорачуваме да го скокнете и заборавите ова видео. Оти вакво шакетање немате видено. Извесен Хулк од турската полиција приведува двајца лопови, им ја покажува техниката и ги тера да вежбаат еден на друг. Доколку е вистина дека криминалците имаат образ дебел како ѓон, овие двајца после видеово се исклучок од тоа правило.

Опасно јака заебанција. Додека човек од Тбилиси, Грузија, со помош на апарат за виртеулна реалност ги разгледува убавините на Ирска, околу него луѓе му ја монтираат најреалната асоцијација на Ирска. Замислете го тој момент кога ги симнува наочарите!

Планот е добар: детето да стави чаршаф на себе и да се преправи во дух и да го извади татко му од памет. Но, секој план има некоја мана.

Мотото на готвачов е "мојата храна нема да ја ставиш на Инстаграм, ама за тоа ќе ја јадеш." Видеото е одлична пародија, а за тие што не го знаат серијалот This is That "е програма која не само што зборува за актуелните проблеми туку и ги измислува."

Два предуслови: мајката да не те знае што правиш и таткото да е невработен махер за компјутерски ефекти.

Ако намерата ви е силна но вољата слаба, тогаш дозволете ѝ на високата технологија да ви помогне во откажувањето на вашата лоша навика. Само да знаете, колку повеќе се инаeтите, толку помалку заби ќе имате, пушеле - не пушеле.

Малку е пипаво, малку треба нерви сето ова да се состави, малку ќе ве гледаат чудно кога ќе играте со пластично шише вода во автобус или на состанок... ама што ви е гајле!

Ако е вистина нароидната дека "многу смеење не е на арно", тогаш ова е многу неарно. Видео компилација од смеењата на Хилари Клинтон. Погодете колку трае? 10 часа! Ние едвај 6 часа издржавме.

Ова е прастаро (во интернет термини тоа се седум години) ама мора да се повтори за да се знае. Една од најдобрите вратки за претходна местенка меѓу пријатели од сајтот Колеџ хумор. Во игра се 500.000 долари и 18.000 луѓе.

Како би изгледало кога сите овие што јадат месо би го тупеле како сите оние што не јадат месо. На човек да не му се верува колку многу аргументи сме имале за да јадеме месо.

Ни доаѓа да се запалиме колку сме глупи кога гледаме вакви трикови и кога не знаеме ни од кај да почнеме да мозгаме како оди тоа.

Човеков пред едно 10 години оди на интервју за работа. Во чекалната доаѓа девојкава и го вика Гај на интервју. Интервјуто започнува и на Гај му станува јасно дека е погрешниот Гај и дека интервјуто оди живо на вести. Не само што се снаоѓа, туку го предвидува начинот на кој ќе се слуша музика деновиве. Гај Гома, легендата на БиБиСи.

За повеќето бродови, проблемите завршуваат кога ќе се сместат во пристаниште и им останува само уште да го пуштат сидрото. Не и за овој брод.

На Холивуд му е лесно да направи блокбастер од лик каков што е Капетан Америка. Но како би изгледала таа филмска франшиза во Европа?

Некое младо манекенче (се вика Филип Димитриевиќ) успева да направи 25 пози за фотографирање за само 29 секунди. Застанува пред тебе и имаш чувство дека листаш каталог. Ако вака вежба на сец и додека оди во веце, јадна таа бешика.

Целата работа од машка перспектива. На кратко, за тие што не се во брак и не знаат, едноставно треба да се подготват за живот исполнет со благослови, мераци, спокој и се што некогаш замислиле. Просто криво да ти е ако уште не си правел свадба.

Стварно, како изгледа брејкденсер кога ќе остари? Тоа е темата на ова видео во кое се најдени учесниците на едно брејкденс шоу одржано во 1986 во тогашниот Советски Сојуз. Денес на свои 40 и 50 години живот. Старките уште мрдаат.

Се потепавме од прскање и потурање, а толку било лесно! Прескокнете го делот со бебешките цуцли, одма на 2:10.

Видео снимка од протести. Локација: Словенија. Цел: стопирање на муслиманската миграција. Што сакандираат анти-муслимански протестанти во Словенија? Доналд Трамп! Доналд Трамп!

Онаа епска сцена од "Apocalypse now" не би била ни напола ефектна без музиката на Вагнер. Истото важи и за ова видео.