Не е јасно што се случува на оваа видео снимка. Јасно е само дека зборуваат на руски. А штом зборуваат на руски, јасно е дека не мора ништо да е јасно.

Ако баба лаже, снимка не лаже. Освен ако не ја скратиш снимката и не ја извадиш првичната пресуда на бабата.

Пазете го ова „очовечување“ на двајцата злотвори. Пазете го посебно Сталко како влегува во песната и како ја ужива цело време. Сладурани.

Тинејџерката објаснува какви проблеми има со мајка ѝ. Ама ај се кладиме дека кога малата ќе почне да плаче, некако ќе ви дојде убаво?

Мала компилација од саможиви нарцисти опседнати со тоа како ќе изгледаат на нивната омилена социјална мрежа и комплетно несвесни за тоа како глупо изгледаат за својата непосредна околина. Некогаш добиваа помош, сега добиваат лајкови.

Еден од оние отворени денови во кои граѓаните можат да поставуваат прашања и пријавуваат проблеми во највисоката инстанца на локалната власт. На дечкото му се собирало, го гледал проблемот насекаде, сведочел како сите минуваат лесно преку него и сфатил дека дека е дојдено до коска.

Показна вежба за тоа зошто оние луѓе кои имаат тврд сон, пред да легнат да спијат, најпаметно им е клучните прсти за отворање на нивниот телефон да ги брцнат во врел катран.

Дечко искачува карпа без да користи раце. Само стопала и колена. Нема никаква потреба од тоа, ама ај.

Француските ученици радосно го дочекаа први септември, почетокот на школската година и враќањето во нормала.

Зошто нема родова еднаквост меѓу оние што испрашуваат и мачат затвореници? Дали тоа општеството ги програмира жените да не помислуваат на тој деловен предизвик за кој се подеднакво способни како и мажите? Дали се потребни субвенции за да се дојде до балансирана застапеност? Рајан Лонг (брз на мисла и на јазик) трола случајни минувачи.

Овој настап е познат како „Инцидентот во Фили“ и е еден од клучните моменти во кариерата на Бур, еден од нај-нај-најдобрите стенд-ап комичари на сите времиња. Излегува пред публиката во Филаделфија која е блазирана, размазена, сите зборат меѓу себе... Така ли? Бур, кој и онака има проблеми со менаџирање на својот гнев, решава цел настап да го посвети на пржење на публиката, нивниот град, држава и сè - ама сè! - што им е најмило. Нема нешто кое не им го насра. И попат им одбројува уште колку минути има да го слушаат. Легендарни 13 минути.

Руско реално шоу во кое нема сценарио а 24/7 се следи животот на пет луѓе (тројца машки и две женски) кои живеат изолирано од цивилизацијата а на располагање имаат неограничен алкохол. Нејасно е како Русите на времето стигнаа до Берлин, пошто овие имаат едни три дрвени скали кои редовно им се покажуваат како кобни.

На самиот почеток на 80-тите години, Сони извади вокмен. 90-тите години ни донесоа World Wide Web. Првата деценија од новиот милениум нè израдува со Ајфон, Киндл и Википедија а втората декада со Тесла, Убер, дронови и 3Д печатачи. Но, тука не запира нашата среќа. Во следната деценија, влегуваме со ова:

На ова не се помага додека не каже јасно и гласно што е проблемот.  За да разбере дека тинејџерите некогаш стварно е тешко човек да ги разбере.

За оние што го користат летечкиот симулатор на Микрософт, место за аџилак им е Мелбурн, односно неговото преградие Фокнер. Таму, сосема нејасно и мистериозно, среде ниските стамбени куќи и згради се издига еден монструм од облакодер. Некому тоа изгледа како тајна порака, како загатка, како упад на Халф Лајф двојката. А се работи за тајпинг ерор.

Само гледајте како панкот е жив, во некоја вукојебина од џунгла. Со моша, со све. Ако уште некој паднеше од горе, ќе помислевме дека џунглава е на два спрата.

Њујоршкото метро е тамбнеил за големата и живописна слика на градот и ликовите кои во тоа урбано тенџере или уште не се стопиле или претерале со топење. Заради пандемијата, цел тој метро свет едно време беше во грч, но еве ги ликовите, повторно се враќаат на својата подземна сцена.  

Со оглед на тоа што постојат доста луѓе кои одбиваат да носат маска, Јутјубер решил да направи пневматски пиштол со кој можеш да залепиш маска на нечие лице. А и генерално може да послужи малку да стишаш некого.

На последното гостување во подкастот на Џо Роган, Бил Бур и домаќинот имаа мала препирка околу маските. Запалија по една пура и фатија да се расправаат дали да се носат маски или не. Имаат скроз различни мислења околу тоа, ама ете, не се заклаа туку само си пуштија по неколку добри јадачки. Го анимирале тој дел од муабетот, и тоа добро.

Група избезумени Пакистанци навалиле на млади борови садници па ги корнат со таква страст, небаре со шејтанот химселф си имаат работа. Зошто? Затоа што Исламот забранувал нивно садење. Не знаевме дека Коранот е толку ботанички детален.

Рускиот кајзер решава ненадејно да застане и да посети една аптека, да види како се со цените и слично. И очекувано, одма хаос, пакао, дрога (на рецепт). Сите збунка освен една бабичка која апсолутно не ја лази мува што се случува околу неа. 

TwinsthenewTrend се близнаци од Гари, не Галичник, туку Индијана. Пуштаат рок песни кои никогаш не ги чуле и онда демек ги рецензираат. На ред им доаѓа “In the Air Tonight” од Фил Колинс. И како што таа песна се слуша главно за да се дочека катарзата со бубњевите (која - како што знае секој нормален музички манијак -  се случува на 3:41 во песната), ова видео се гледа само за да се види нивната реакција на тој момент. Се избезумија! „Брат, не сум видел некој да извади ритам во трета минута од песната, брат!“

Јасно е дека црната баба не е голем фан на жолтата раса, ама прејако е како сочно го хејта. Како да изговара реплики од филм на Квентин Тарантино.

Не е потребен Гордон Ремзи да ви каже дека повеќето работи кои ќе ги видите на ТикТок не се ставаат во уста. Ама, ако, нека каже. Се ужасна човекот како кога Ник Кејв би рецензирал песна од Мими Мерцедес.