Како што на Перхан во она алкохолизирано лудило му личеа трубачи на уво, така и на Снуп дог во оваа негова блажена скаменетост, пасент му легнува баш оваа музика. Марли, Питер Тош, Строубери филдс форевер? Ма не, нешто многу појако.

На Дагестанецов жената му се бунела што не може да поминува подолго време заедно со својата најдобра пријателка. Овој ѝ го решил проблемот на начин кој не го очекувала: ја оженил и нејзината најдобра пријателка. Инклузивност, јеби га.

Ќе да е воена парада. Во Египет. Или униформите им се на перење или па може стварно мислат дека непријателот ќе биде обесхрабрен од нивните мускули.

Глуви ќе прослушаат, слепи ќе прогледаат.... само глупи нема да се опаметат. Дерен Браун објаснува како најчесто се прават оние измами со луѓе кои ветуваат исцелување со помош на верата.

Не дека ние не би се зезнале, можеби на друга сума, ама на истата понуда. А понудата е да ти дадат пари ако ти истурат ДВЕ чаши вода на глава.

„Тука беше, имам сведоци!“ Сцена од еден италијански филм („Бившите 2: И натаму пријатели“) кој го даваат на Фокс ТВ.

Стариот мајстор, најшармерски во свет, на табла ги објаснува основните форми на приказните. Магијата  на пишувањето е во тоа што во суштина само три такви форми се, ама на луѓето никако да им здосадат.

Онлајн настава сме виделе како изгледа. Онлајн работен состанок сме виделе како изгледа. Онлајн дружење со пријатели сме виделе како изгледа. А сега да видиме како изгледа кога една онлајн дискусија се претвора во онлајн физичка пресметка.

Кога си Бил Бур, успеваш да се избориш да ти направат ролја која ти лежи на табиетот/имиџот и која не е кринџ за да можеш утре слободно да шеташ по улици и медиуми без да викаат, еве го оној лигушот од рекламата.

Премисата е следна: што ако докторите ги интервјуираат за работа како што програмерите ги интервјуираат за работа? (Не дека доктори би дозволиле такво нешто.)

Момчето радосно го отвора чекот од првата плата во неговиот живот и за првпат дознава колку државата му задржува. Да беше кај нас, фацата дополнително ќе му се скаменеше ако знаеше дека со неговите задржани пари се плаќаат луѓе кои седат дома, специјални обвинители кои земаат мрсни бонуси за да чуваат тајни, невладини кои живеат од владини пари, брусење сонца на шахти, иновации за рачна изработка на керамички производи... 

Планот на таткото на едно 15-месечно дете е да му направи алпинистички ѕид во собата на малиот за да го натера да престане да се пентари по мебелот по дома. Резултат: малиот станал ѕвер во пентарење и сега веќе нема каде не може да се качи.

Екипата на Конан доаѓа до генијална идеја за сервис кој сè повеќе е потребен на сè поголем број луѓе. Раце кои ве водат низ животот додека вие безбедно пловите по интернетските води. Не знаете за кои сè ситуации можат да ви се најдат.

На една преглупа рап песна чиј текст вика „No baby, we can't have the baby. If you don't take this Plan B, bitch, it's plan C“ треба да го заџиткате бебето/детето кое го држите в раце и со тверкање да продолжите да ја славите уметноста. Тоа е најновиот тренд по социјални мрежи. Едвај чекаме да НЕ видиме како ќе биде кога ќе пораснат овие деца и ќе видат каква употребна вредност имале за оние кои ги растат.

Да издржеше уште некоја секунда, ќе станеше маалска легенда со години. Човек кој држел камион на своите плеќи. Ама камионот победи.

Дечкото решил да го освои срцето на својата сакана на најолдскул романтичен начин, со пеење серенада пред нејзиниот двор. Знаете веќе, како што оди онаа нашата, од рахметли Гоце Николовски, која вика: „Тивко свирам за да можеш, да ме чуеш само ти / И евентуално твојот дечко за кој немав појма дека го имаш....“

Зумерите (генерации кои дојдоа после миленијалците) се веројатно најактивните произведувачи на кликови и лајкови по кои се обликува и пошироката медиумска и политичка слика. Рајан Лонг (го запознавте овде) решава да креира политичка платформа изградена исклучиво од мислењата на едни од најнеразбраните меѓу нив - 20 годишните девојки. Како би изгледала таа понуда?  

Сигурно сте налетале на оние згодни, кратки, пет минутни преправки за по дома/кујна/двор за кои си викате дека мора нешто да пробате и никогаш ништо не сте пробале? Некој седнал и ги издвоил најглупите.

Не е јасно што се случува на оваа видео снимка. Јасно е само дека зборуваат на руски. А штом зборуваат на руски, јасно е дека не мора ништо да е јасно.

Ако баба лаже, снимка не лаже. Освен ако не ја скратиш снимката и не ја извадиш првичната пресуда на бабата.

Пазете го ова „очовечување“ на двајцата злотвори. Пазете го посебно Сталко како влегува во песната и како ја ужива цело време. Сладурани.

Тинејџерката објаснува какви проблеми има со мајка ѝ. Ама ај се кладиме дека кога малата ќе почне да плаче, некако ќе ви дојде убаво?

Мала компилација од саможиви нарцисти опседнати со тоа како ќе изгледаат на нивната омилена социјална мрежа и комплетно несвесни за тоа како глупо изгледаат за својата непосредна околина. Некогаш добиваа помош, сега добиваат лајкови.

Еден од оние отворени денови во кои граѓаните можат да поставуваат прашања и пријавуваат проблеми во највисоката инстанца на локалната власт. На дечкото му се собирало, го гледал проблемот насекаде, сведочел како сите минуваат лесно преку него и сфатил дека дека е дојдено до коска.