Поуката е кога во живот ќе видиш прекинувач вклучи го, или, во Њујорк сè е поубаво. Избери која сакаш.

Пред да се помамите по насловот и извичникот во него, редно е да се каже дека уредништвото на најпосакуваниот календар на светот реши за 2016-та да ја ангажира познатата фотографка Ени Либовиц. Кој знае, знае. Во секој случај, Јоко Оно и тоа си дочека. Па, не е фер.

Клипов е дел од оние редовни ставки во промоциите на нови филмови, овој конкретно е за Гневните осуммина (The Hateful Eight) на Тарантино. Во него ги има очекуваните елементи: разговор со филмски ѕвезди, режисер и исечоци од филмот... и сето ова е небитно, клипов треба да се гледа само за да видиш како изгледа човек кој со еснафски мерак и детска радост зборува за својата работа и она што го направил. Човекот е Тарантино.

"- Прво да го поминеш тестот (писмената, полугодието, годината), па после што сакаш можеш да правиш". Така? Заебан (многу заебан) краток филм за родителите кои премногу ги напнуваат своите деца со успехот во училиштето. Приказната е базирана на вистинита случка.

Од последното венецијанско биенале, одиме во јапонскиот павиљон кај инсталацијата на јапонската уметничка Чихару Шиота (последните две децении живее во Берлин). Магично.

Се чини дека Кристофер Колумбо е еден од оние историски ликови за кои можеме да имаме консензус: дека бил визионер, голем и храбар морепловец чиј подвиг откри нов свет со што беше отворена вратата кон развојот и модерноста. Чекајте малку, а да ги прашаме Индијанците што мислат за него?

1958- ма година, неврзаното другарче на Тито, египетскиот претседател Гамал Абдел Насер раскажува како пробал да најде компромис со Муслиманското братство (според познавачи, организацијата која денес е мајка на сите терористички организации) па го прашал нивниот главен што тие би сакале.

Во секоја војна има по некој ваков . Голем, набилдан и демек бестрашен, медиумите ќе го наречат Рамбо, луѓето ќе се попалат по него. Ирачаните го имаат него, Абу Азраел, кој има дури и слоган кој значи "nothing but flowers" (тешко дека му е од Тalking Heads). По некое време ќе загине, или пак, како хрватскиот Рамбо, ќе заврши во затвор како плaтен убиец.

Па што не кажете така, можеме ние и никогаш во живот веќе ништо, ама ништо да не јадеме. А таман човек ќе развие еден поштен страв дека во Кина најлошо нешто што можат да ти подметнат за јадење е куче.

Скоро и да сме заборавиле дека вака детски искрена радост можеш да дочекаш од возрасен човек.

Редовниот ЕУ дисидент - Жижек, новокомпонираниот - Варуфакис и најпознатиот жител на еквадорската амбасада во Лондон, Асанж. Тројцата денес во Лондон разговараат за Европа, а модератор им е хрватскиот филозоф Сречко Хорват.

Неправедно потценета и маргинализирана, ја сакаме главно затоа што е здрава или кога во Мимоза ни ја навестува пролетта. А таа е чист хедонизам. Еве го видеото со неа. Мммммм.... марула!

Бугарите одлучиле да прават цртан филм со ликови извадени од бугарските приказни и легенди. И како може да изгледа бугарски цртан, со бугарски ликови? На прв поглед, некаде помеѓу фантастично, страхотно и умопомрачително... Пред да кажеме дека е како Дизни и Пиксар да го правеле, ви го претставуваме Златното јаболко, за сами да одлучите.

После квалификувањето на Еуро 2016-та, Албанците снимаат документарец за тоа како стигнале до Европско. Насловот на документарецот е Битка на Балканот. Малку претерано епски ама па и не е мало достигнување, ем нивен документарец е, и можат да го крстат како сакаат.

Првиот на гости кај вториот. Разговорот почнува околу стратегијата "сите да ги збришеме од Земјава" во однос на проблемот со ИСИС. До крај, сè што ти е на памет е - овие двајца ко да не се сакале бе.

Драгоцен муабет меѓу татко и син, спонтано настанат на улиците на Париз.

Британско видео во кое се објаснува оваа тема на најбритански можен начин. Имаме ли ние консензуална пијачка?

Студентка муслиманка поставува прашање зошто се сее страв од Исламот кога огромното мнозинство верници се мирољубиви и фиљан луѓе. Добива одговор кој Бил Мар веднаш би го потпишал.

Да ти е тапа ви-фито е една работа. А тапата да ви е ви-фи е сосема друга.

Наспроти сите јади и беди по светов чие покривање би требало да им се во описот на работата, на CNN се разви дебата дали би го абортирале бебето Хитлер. Старата дилема ја актуелизираше републиканскиот кандидат за претседател Бен Карсон, хард-кор евангелист и конзервативец (оној кој тврдеше дека египетските пирамиди се силоси за жито).

Јер мовембар па ќе почнат сите да ги пуштаат, да видиме еден стар но обновен изум кој помага да не се гледа баш сè што јадел и пиел гордиот и освестен носител на мустаќ.

Еден глас, премногу ликови, повеќе добри дијалози од цела сезона домашни обиди за комедија. Еден од подобрите и автентични Јутјуб канали што излегол од Балканиве во последно време.

На свои 18 години дечкото решава да сними дел од неговото интервју со самиот себе. 36 години подоцна конечно седнува да го доправи муабетот. Што е првото нешто кое младиот јас го прашува постариот јас? Нормално: Богат ли си?

Земаш автомобил и го фрлаш во машинава, цел, сосе мотор, седишта, гуми, осовини и што и да има цел автомобил (да, и кука). Машинава го вади на делчиња (што е поразлична агрегантна состојба отколку "на делови").