Несвесни какви сè софри се случуваат во овој дел од светот од 20 декември до 20 јануари, на Јутјуб масовно почна да се шири предизвикот 10.000 калории, во кој како успех се доживува консумирање 10.000 калории, не на едно седнување, туку во еден ден. Професионална забелешка на предизвикот - разочарувачки неинвентивно го исполнуваат лимитот.

Почетните неполни три минути од филмот наспроти сите ваши прашања - од кај се накотија толку идиоти во светот.

Запознајте го Пол. Пол е сингл. Од пред малку, многу, многу сингл.

Ако некогаш тоа биле чудесни животни и невидени народи и култури, денес егзотика повеќе се сврте на - луѓе што физички работат. Над 300.000 шерови и 15 милиони прегледи на Фејсбук.

Енди Ворхол го мразел Френк Запа од дното на душата. Па сепак го вика на интервју во неговата тв емисија, на почетокот на 80-тите. Како и секогаш, на Запа брзо му се пушта вилицата а Ворхол во целиот разговор не зуцнува ни збор.

9 јануари 2007, Макворлд Експо во Сан Франциско, Стив Џобс излегува на сцена во својата стандардна униформа и започнува со претставување на уредот кој комплетно го промени текот на технологијата и општо човештвото.

Мала лекција од наркономија. Децении наназад цената на кокаинот е една од најстабилните цени на светот и стои на 150 долари грам чист кокаин. Зад ваквата реалност стои економската категорија монопсонија, што значи монопол над побарувачката која ја имаат картелите. Сето тоа на грб на (јужноамериканската) Ленка.

Крајот на мандатот на Ки и Пил беше пред некое време, сега за крајот на мандатот на Обама, Пил како Обама, а Ки како Лутер се враќаат за да се поздрават со народ пред пакување од Белата куќа.

Не е редот да го спомнуваш Путин само кога ти е зорт, треба и празник да се честита, па макар вие биле само неколку луѓе, со Пунто и хармоника сред шума во Србија.

Една чудна комунистичка утопија со 2.000 жители кои имаат луксузни куќи и автомобили и минимум 250.000 долари на сметка. Само што за богатството им важи принципот "мрднеш - губиш".

Нормално: татко ти и мајка ти не зборат меѓу себе. Проблем: веќе десет години не зборат еден со друг. Јапонски проблем: не се разведени, живеат заедно и пак не зборат десет години.

Што во Америка може да спречи група мирољубиви црнци да снимат видео спот за песна во која се пее за љубовта, пријателството и разбирањето меѓу луѓето? Полиција.

Имате две, една кратка, една долга. Двете се на Британци. Првата е на терминално бесниот Џонатан Пај, втората е на снајперски прецизниот Чарли Брукер. Уживајте во ревизијата на светот во 2016.

Не оние тажните и срцепарателните што правеа да ти се одмили светот, туку оние погрешните.

Види што сè можело да се нац'цка во една саксија. А ние пипер-патлиџан ќе насадевме.

Екранизирани совети на американскиот професор Роберт Рајч за тоа како да се справиш во ситуација кога на празнична софра некој ќе почне да те гуши со десничарски ставови. Јбг, немаме видео со совети за обратната ситуација, кога на пример социјалдемократ, распослан на мрсна софра, ќе те убедува дека не може веќе да гледа како народот гладува.

Откако го објавивме видеото за Амазон Го стана речиси дневна рутина некој да ти каже нов начин како да им го хакнеш системот (па ќе го држам цело време позади некој друг, ќе го пуштам да се тркала до влезна врата, ќе фрлам конец од надвор...). Французиве најдоа начин како да го хакнат и Амазон Го и криминалецот во нас.

Што значи „шоу во живо“ за луѓето што го прават шоуто во живо. Таман ќе помислиш - чекај бе овие којзнае колку студија и опрема имаат за да можат цело шоу да го снимаат во живо, и они цела сценографија ќе ти демонтираат за помалку од 2 минути.

Ако ги немате сретнато до сега, видеата на Tasty се најлошото можно нешто што може да те спопадне на интернет. Наивно гледаш нивен клип од 18 секунди и го гасиш табот. За кратко пак го отвораш табот, чисто за да изгледаш уште еден клип. Креваш глава од монитор, минале 3 саати, прегладнет си, разочаран од животот, ти течат лиги, а знаеш дека во фрижидер имаш само тегла кисели краставички и кесичка супа од петел. Налет сè, пушташ уште еден клип.

In a Turkish galaxy far, far, away... Или, што би се рекло на нашки: Турче галакси, уџум, уџум ептен....

Глен Бек е една комплетна лудачина (самопрогласен катастрофист), кој повеќе од 10, а посебно последниве 8 години, секој потег на американските либерали, посебно на Обама, го доживуваше апокалиптично и идентично ѝ го пренесуваше на својата публика. Иако десничар до срж (на времето ја поддржуваше и Чајанката) тој пред изборите се крена против Трамп. Во моментов, поделеноста во САД е дојдена до точка во која Глен Бек стана глас на разумот (ок, со прилично реформирани ставови) и почна да учи левичари - опрајте се, станати сте катастрофисти, личите на мене.

Погледнато од аголот на Алекс Хигинс, чија екипа смета дека корпорациските медиуми се трудат што подлабоко да го всадат стравот од лажните вести со цел во крајна линија да се ограничат или уништат независните и алтернативни медиуми со вовeдување цензура на погледите што се против естаблишментот. Хмм...

Американец ќе изеде една порција, Французин ќе изеде една порција. По некое време, Американецот станува двојно подебел од Французинот. Јасно е каде е иксот во равенката?

Редит, или „фронт пејџот на интернетот“, е една од навлијателните глобални платформи за промоција или добивање гласност на вести, музики, видеа и секакви други содржини. Нивниот комјунити модел (корисниците гласаат за и против) се чинеше како ефикасна заштита од манипулации. Но ако таму е толку лесно да се штима популарност, тогаш интернетот наскоро ќе дојде во фаза кога ќе се верува во нешто прочитано на него само ако лично се познава авторот.