За волја на вистината ни ДЈИ не го сметаат ова за дрон за секого, туку за крајно професионален дрон за полиција, пожарникари, спасувачи или сопственици на непрегледни нафтени полиња, соларни панели и слични инсталации.
Иако има цела вреќа камери и оптика, М30 за разлика од помалите колеги не е замислен за кинематографија. Ова останува и покрај тоа што доаѓа со:
- 12 мегапиксели широка 4К камера што снима во 30 фрејмови.
- 48 мегапиксели зум камера (16х оптички / 200х хибриден зум) што снима видеа во 4К, а фотографии во 8К резолуција.
- Термална камера.
- Ласерски мерач на далечина.
Батеријата му држи некои си 40 минути летање.
За дронот за прв пат има и ДЈИ док, станица за полнење и слетување што дозволува поголем досег на лет и далечинско користење на дронот. Докот дозволува „автоматски, репетитивни летови на дронот, дури и во најсуровите климатски услови“, што го постигнува со отпорност на вода ИП55, и опсег на температура за работа од -35 до +50 степени Целзиусови. Плус, докот доаѓа со сопствена метеоролошка станица која на лице место проверува дали временските условите се поволни летање на дронот. Да, на докот му треба струја и интернет мрежа (иако има опција да му се стави 4Г картичка). Инаку, полнењето на дронот е 90% од батеријата за 25 минути.
Комплетот док + М30 дрон е 29.999 долари.
