Текстот во рубриката Стигнавме на дното е преземен без интервенции од порталот Курир.
Игралиштето за кошарка на улица „Косовска“ во Штип вчера попладне беше предадено во употреба од страна на градоначалникот на Штип, Илчо Захариев.
Станува збор за руинирана локација која со мала инвестиција е претворена во корисна површина за децата од овој дел на градот. Помладите долго време бараа спортски терен за да можат да имаат место за игра и забава.
- Мора да кажам дека ова претходно беше локација која важеше за наркоманско дувло. Ние успеавме со мала инвестиција да ја адаптираме локацијата. Поставивме клупи за одмор, цементиран е дел од површината, поставена е нова висока заштитна ограда и еден нов кош, со што се отворија можности помладите членови на оваа улица да играат баскет, а повозрасните да одмораат на клупите и да уживаат во најубавиот поглед на Штип, истакна Захариев.
Теренот за кошарка го носи името „Цар Самоил“ и на него вчера играа децата од улицата облечени во маички со истоимениот наслов а настанот го збогатија и играорците од КУД „Ристо Донев-Учителот“. Градоначалникот најави и нови рекреативни содржини на уште неколку улици во овој дел на градот.