„Кога ќе се спомне фавела, автоматски се помислува на опасност, насилство, хаос и бескорисност“, вели еден модел во краткиот филм за различните лица на модата во Рио. „Има и тоа, ама има и куп убави работи, ова е магичен свет“.

После 4 месечни истражувања и тајни снимања, британскиот Канал 4 вади документарец во кој се откриваат сите изборни измами на осрамотените Кембриџ аналитика: мито, бивши шпиони, лажни лични карти, сексуални работнички...   

Не постои поомразен дел од нашето тело од салото. Луѓето го сметаат за грдо, непотребно и нездраво. А се работи за за еден комплексен орган, есенцијален за човечкиот живот исто како што е тоа срцето или дробовите. Краток документарец (20 мин) кој ќе ве натера да размислите дали одамна лустрираното сало не заслужува рехабилитација.

„Немој ни да си помислил да паркираш овде“ е кратко и забавно филмче за тоа што мислат локалците за оваа заебанција во нивниот град. Еден паталец вика дека е скроз нормално човек кој успеал да стигне на забава, на забавата цело време да се одушевува какво добро паркинг место нашол.

Технички штракање на тастатура е мануелна работа, практично, да не се лажеме, не е, ама па за тоа знаеме да најдеме луѓе што стварно го вадат лебот со раце и се совршено вешти во тоа.

Американски продуцент на фина тезга во Шангај, треба за Кинезите да сними реклама за Мекдоналдс. Џон Бенет инаку ја сака својата работа и добар е во неа, и сè е е тоа во ред. Ама почнува да се прашува: чуму ова? 

„Балкан Ројал“ е филмче посветено на Петер Димитров, човек кој живее од реставрација и продажба на стари пијана а сонот му е еден ден да стане она за што учел. „И да можам да го вратам времето назад, пак попрво би го правел ова отколку да имам кариера како некои други колеги музичари“, вели Димитров.

Џемс Ренди е еден симпатичен старка кој до свои 60 години изведуваше магионарски трикчиња а потоа се пензионираше и со задоволство по телевизии раскринкуваше секакви преваранти кои тврдеа дека имаат надприродни и паранормални моќи. Една компилација од таквите моменти.  

„Пред дождот“ дојде како Deus Ex Machina, да ми го спаси животот. Тоа е вистината.

Дечкиве зборат, ние гледаме. Тема: српска рејв супкултура. Ликови: тројца.

Цели 8 години Џим Џармуш и Иги Поп работеле на документарецот Gimme Danger, посветен на бендот Стуџис. За редовната музичка публика на коњопоите на Дежа Ву, Иги Поп е оној босиот, што значи останува Џармуш да е другиот.

Одлична Би Би Си приказна за германскиот звук роден кон крајот на 60-тите, поспрдно наречен Краутрок. Нејќеле да звучат германски (заради багажот на Германија од тазе војната), а нејќеле да звучат ни англиски. Па им останало музички да ја дефинираат вселената.

Лика го даде Никола Тесла, Словенија го даде Херман Поточник (види го мокументарецот "Houston, we have a problem") а Гана го даде Апостол. Апостол Доктор Квадво Сафо Кантанка, генијалниот инжинерски ум кој со локални материјали и уште полокални заварувачи на својата земја ѝ возврати со првиот џип со погон на 4 тркала и првиот тенк. Тенк!  

Некогаш и харизматичните водачи околу кои се гради култот не се свесни што се случува околу нив.

Траудл Јунге влегува во најтесниот круг на Хитлер во 1942 кога има само 22 години и останува со него до последниот ден. Нејзе Хитлер ѝ го има диктирано својот тестамент и според нејзините сведоштва се реконструирани последните денови во бункерот во филмот Der Untergang. Пробува да објасни како е можно да си во центарот на збиднувањата а да си во слеп агол на она што се случува наоколу.

Репортажа од Сирија или Ирак моментално е светиот грал меѓу новинарите и авторите на документарци. Врвот е ако можеш да влезеш меѓу ИСИС и да направиш репортажа од таму (а не можеш), на чекор од врвот е да бидеш примен од курдските сили кои на фронтовските линии против ИСИС, посебно во неодамна ослободените градови. Кемп на почетокот од годинава го почнува својот аџилак со Курдите.

Њујоркер има документарец од шест епизоди за патот на бегалците од Сирија. Третиот и четвртиот дел се за Македонија. Ги видовме, ги препорачуваме.

Вајс њуз добива снимка од монтираната камера на еден од борците на ИСИС кој во март 2016-та загинува во борба со Пешмерга силите во северен Ирак. Битката е на околу 50 километри северно од Мосул. За разлика од ИСИС пропагандата кој се труди борците да ги претстави како копија на германската дисциплина, снимката ги покажува нередот и забуната карактеристични за вакви организации. Видеото вчера е објавено.

Членовите на ЕКВ, Партибрејкерс и Електрични оргазам на времето се качија на камион и ја шпартаа нивната музика по Белград, обидувајќи се да се спротивстават на безумието на војната и да го надгласаат звукот на оружјето и хушкачките медиуми кои го подмачкуваа. 24 години подоцна, излезе комплетниот видео материјал од тоа.

Муслиманското братство е организација создадeнa уште 1928-мата година во Египет. Во нормалните времиња нивните идеи служеа за потсмев (го видовте она со Насер?) а денес се сметаат за матица на сите злотвори кои делуваат во името на Исламот. Норвешки документарец на тема, каква закана се тие за нашиот начин на живот. Штом ладнокрвните Норвежани порачуваат "Погледнете го филмот пред да биде доцна" јасно ви е.....

За првпат откако вооружените терористи го прекинаа нивниот париски концерт и отворија оган оставајќи зад себе 90 жртви, членовите на бендот за Вајс раскажуваат како било да се биде на тоа вистинско место во тоа погрешно време.

Приказна за човечноста и за тоа како, иако некогаш бавно, добрината умее да се врати. 

"Кој не слуша песна, ќе слуша олуја" - Горан Бреговиќ

Емотивна и на моменти бескрајно тажна приказна за едно македонско семејство во Австралија кое се превира и крши поради сексуалноста на синот. Таткото не зборува со него цели 15 години, остатокот од семејството му удира бојкот на синот, пуста мајка е во средина меѓу мажот и чедото...