Аферата Драјфус на италијански начин

14 месеци затвор за уредникот на италијанскиот Ил Џорнале. За навреда, напишана од анонимен коментатор. Чекајте, има пресврт.

Врховниот суд на Италија ја потврди 14 месечната затворска казна за Алесандро Салусти, моментално уредник на десничарскиот весник Ил Џорнале, во сопственост на медиумската империја на Берлускони. Контроверзно во случајот е што текстот кој е оценет како навредлив е напишан од анонимен автор, потпишан со псевдоним Драјфус.

Станува збор за постар случај, од 2007-ма година, кога во во весникот Либеро во кој Салусти тогаш беше главен и одговорен уредник осамна осуда на одлуката на судот да дозволи абортус на едно 13 годишно девојче. Па "Драјфус" бараше смртна казна за судијата, гинекологот кој ќе го врши абортусот и родителите на девојчето.

По одлуката на Врховниот суд, Салусти рече дека не му е страв да оди во затвор и дека ќе даде оставка на уредничата позиција за доброто на весникот и на читателите. Гневен на одлуката, оцени и дека вакви одлуки се карактеристични за репресивни режими како Сирија или Северна Кореја.

И други новинари се вознемирени од одлуката на судот. Загриженост изрази и новинарскиот синдикат а експерти за уставно право велат дека е апсурдно во 2012-та година новинар да лежи во затвор заради искажано мислење.

Најинтересниот момент е што после 5 години тегнење на случајот по сите италијански судови, Драјфус сам се пријави.

И тоа не е никој друг актуелен член на италијанскиот парламент од редовите на партијата на Берлускони. Ренато Фарина тогаш бил заменик уредник на Либеро. "Јас го напишав текстот и јас ја преземам сета законска и морална одговорност," изјави Фарина пред парламентот, барајќи обвновување на целиот судски процес.

Загриженост за вакви епилози се изразува и во врска со македонскиот предлог закон за навреда и клевета.