Потребни состојки:
- 500гр мелено месо (јунешко или свинско)
- 1 модар патлиџан
- 2-3 тиквици
- 1л доматен сос
- кромид
- сол
- бибер
Пола живот бев спортист. Се имам изнавежбано и изнајадено здрава храна за цел живот.
Но, во животот после сето тоа, ти се случува зима и сите празници, и сите слави и мрсни јадења, и сите руски салати и кифлици, и седење дома пошто ти е ладно и нарачување пици и остали чуда, и додека се свестиш, веќе не те собираат фармерките!
Е сега, од тука почнуваат оние други непријатности. Сакаш да се дотераш, ама ништо не ти стои. Сакаш да го заведеш партнерот, а се чувствуваш комплетно несекси. Сакаш да го облечеш најомиленото парче облека, а не те собира повеќе. Е тука веќе, застануваш пред огледало и си се обраќаш на себеси: “Па добро бе, зошто?!“, а твојот одраз ти враќа со шамари: “Е па, пошто јадеше ко да не постои утре и многу ти беше убаво, ете затоа!!!“
Сум била на секаков вид на исхрана, но можам да кажам дека оваа хроно исхрана многу ми се допaдна и многу ми одговара. Еве веќе десетина дена терам, па ќе видиме до кога. Затоа денес на мени хроно мусака.
Чекори за подготовка:
- Во пошироко тавче ставете маслиново да се загрее и запржете го кромидот. Јас ставив пола средна главица. Додадете го месото и пропржете го убаво. Зачинете го со сол и бибер. Можете да додадете и малку лут зачин, како на пример чили, се разбира доколку тоа го сакате.
- Додека си се пржи месото, исецкајте ги тиквиците и модриот патлиџан на крукчиња. Земете тава или огноотпорен сад и намачкајте го со маслиново.
- Наредете ги кругчињата од тиквица во еден ред, потоа ставете од месото. Наредете го модриот патлиџан, па повторно од месото. Последниот ред ќе ви биде од остатокот крукчиња од тиквиците.
- Полијте одозгора со доматниот сос, зачинете со сол и бибер и ставете ја да се пече на 200 степени околу еден час. Доколку имате многу течност после еден час, допечете ја уште онолку колку што мислите.
- Извадете две парчиња, послужете ја со зелена салата и краставица или нешто по ваш избор. Уживајте!
