На кое место светските кладилници ја сместија Македонија

Со влог од 100 денари дека ќе бидеме шампиони, може да земете 25.000 денари, ама бидејќи Македонија не е Вардар, реалната слика е следна.

Златен медал за Франција, сребро за Хрватска, бронза за Данска. Тоа е прогнозата за Европското првенство во Хрватска кое стартува денеска, според коефициентите на кладилниците.
 
Ги земавме двете најпознати Bwin i Bet365. Според првите Македонија ќе биде на делба на 11-то и 12-то место со Исланд, а коефициентот дека ќе го освои Еврошампионатот изнесува 251.

Вторите ни даваат нешто поголеми шанси, а тоа е делба на 10-то и 11-то место со Србија и коефициент за титула од 100.  

Избраниците на Раул Гонзалес се во тешка група со Словенија, Германија и Црна Гора, а во сабота со почеток од 19:30 силите ќе ги одмерат со составот на Веселин Вујовиќ кој на минатиот Мундијал го освои третото место.

Фаворитската улога е јасно дека оди на нивна страна.

За Македонија ова ќе биде петто учество на Европските првенства. Во меморија уште ни е врежано она историско 5-то место од ЕП 2012 во Србија.

РФМ денеска најави премија од 30.000 евра за репрезентацијата доколку се оствари пласман во втората фаза од првенството и дополнителни 30.000 евра (или вкупно 60.000 евра) за пласман на некое од првите 6 места на првенството.

Ако сениорите успеат да стигнат до полуфинале, Претседателот на РФМ вети премија од дополнителни 40.000 евра или вкупно 100.000 евра за ваков висок пласман на шампионатот.

12 јануари 2018 - 16:04