Приказната за најубавата божиќна песна на сите времиња

Колку и смртта да нè прави попустливи, за нас најубавата не е онаа од Џорџ Мајкл. Ова е приказната зад неповторливо тажната "Њујоршка бајка" на Поугс. Антидот на вообичаените празнични тралалајки, химна за оние со скршени соништа и неисполнети копнежи, која комбинира разуздана музика со заебани и мрачни стихови. А таквите највеќе ги сакаме.

„Њујоршка бајка“ почнува со тоа што ирски емигрант во Америка слуша како старец ја пее баладата која го потсетува на дома. Се сеќава на девојка си со која се засакале во новиот крај, и нивните неисполнети желби, и тие да имаат „автомобили големи како барови и реки од злато“. Дуетот си разменува „нежности“: таа го нарекува ѓубре и фејкер, тој неа дроља и џанак, но рефренот секогаш се заокружува со веселото „и ѕвоната ѕвонеа на Божик“.

Има повеќе верзии како настанала песната. МекГоуан, инаку роден на самиот ден на Божик во 1957, тврди дека се работело за облог помеѓу него и Елвис Костело, кој му пререкол дека не е способен да напише божикен дует, кој требало да го испее со басистката на групата, идната жена на Костело, Каит О’Риордијан.

Од друга страна, хармоникашот Џејмс Фернли вели дека нивниот менаџер сугерирал да направат кавер на песната „Божик мора да е вечерва“ на Д Бенд од 1977. Во неговиот мемоар Here Comes Everybody: the Story of Pogues тој вели: „Тоа беше ужасна песна. Веројатно сме рекле заеби, ќе си направиме своја“.

Без оглед на мотивот, поминале повеќе од две години за песната да се усоврши и да се сними, (пак) иронично среде жешкиот јули 1987, во Лондон. Оригиналниот план да се снима со О’Риордан пропаднал, бидејќи таа во меѓувреме се омажи за Костело и го напушти бендот. Костело пак бил заменет со Стиви Лилиуајт, кој ја донел својата жена (МекКол) за да ги сними пробните вокали. Сите биле толку воодушевени од нејзината изведба што морале да ја ангажираат.

Насловот е всушност „дрпнат“ од ирско-американскиот автор Џ. П. Донливи, и неговиот роман „Њујоршка бајка“. Главниот лик во него го опишува Њујорк како „град кој е премногу богат за да некој да му се потсмева, и премногу осамен и груб за да некој да го сака“. Полицаецот што го апси МекГоуан е Мет Дилон, кој ја прифатил улогата како голем фан на Д Поугс.

Иако никогаш не станала божикен број 1 хит во Британија, се смета дека се има продадено во повеќе од 1,18 милиони копии. Годишно носи приход од околу 470,000 евра, а постојано е број 1 во анкетите за омилена британска божикна песна.

МекГоуан пак пред овој Божик се појави во јавноста по долго време, прилично исцрпен (не оти некогаш изгледал здраво), откако во 2015 ја скрши карлицата по несреќен пад.

Следната година песната ќе ја одбележи својата 30-годишнина.

 

27 декември 2016 - 13:12