Херојот кој по 30 часовно летање облече копачки и реши финале

Честа и привилегијата да се носи репрезентативниот дрес колку што може да биде голема, знае да биде и тешка, особено за еден уругвајски фудбалер кој после овој јуначки подвиг заслужува двочасовна масажа на нозете во леген со топла вода и слободен викенд.

Уругвајскиот репрезентативец Џорџан Де Араскаета кој е член на Крузеиро, имаше азиска турнеја со својата селекција која во термините за пријателски средби закажа гостувања против Јужна Кореја и Јапонија.
 
Сè ќе беше полесно за него ако овие средби се играа во некои летни термини кога мирува клупскиот фудбал или уште поедноставно да го ослободеа со оглед на важноста на натпреварот која му следуваше во Бразил.
 
Но 24 годишниот напаѓач одговори јуначки и на репрезентативните и на клупските обврски, а на крај излезе и херој како никој на ваков начин.
 
 
Уругвај ги одигра и ги загуби двете пријателски во рок од 5 дена, прво 2:1 од Јужна Кореја, а потоа 4:3 од Јапонија, а Де Араскаета настапи само на вториот меч.
 
Потоа од јапонскиот град Саитама фати авион за Абу Даби, а од таму правец во Саи Паоло каде го чекаше не првенствен натпревар, туку финале во Купот на Бразил меѓу неговиот Крузеиро и Коринтијас.
 
И наместо како сите други репрезентативци кои обично се враќаат во клупската база во среда, а ги чека натпревар во сабота или недела, за Уругваецот немаше време за одмор ниту еден ден.
 
Џорџан Де Араскаета слета во Сао Паоло на само 4 часа пред стартот на финалето и се упати директно на стадион за да му помогне на својот тим да стигне до пехарот.
 
 
Тренерот свесен за неговиот замор кој е логичен после толкав пат од крајот на светот, го сместил на клупа, но во 67 минута при резултат 1:1 го пуштил во игра. 15 минути подоцна успеал да даде гол вреден пехар за својата екипа.
 
На неговиот настап и победнички погодок му претходел пат од околу 20.000 километри или вкупно 30 часа малтретирање.
 
И тоа не е сè. За новиот пехар во витрините Крузеиро ќе добие награда од 13 милиони долари, како и директен пласман во Копа Либертадорес 2019.
 
Голот на Де Араскаета
И големото славје
Претседателот на клубот заврши во џакузи со се облека
18 октомври 2018 - 16:39