Kласичната музика прави да трошиме повеќе

Шведска професорка порачува: музиката пуштена во продавниците и трговските центри може потсвесно да ја зголеми желбата за купување скапи работи. За среќа по нашите не го пуштаат Бетовен.

Обликот, мирисот, звукот, сите овие фактори можат да влијаат врз однесувањето на купувачите. Кога станува збор за музиката во продавниците обично се пуштаат ненаметливи инструменталки (има и посебен жанр shopping music - за повеќемина асоцијација на лоша музика). Но за постигнување на вистинскиот ефект е потребно малку повеќе од ова - тврди Перниле Андерсон, професорка по психологија на Универзитетот Карлстад во Данска.

Според неа класичната музика често се поврзува со софистицираност и висок квалитет, со „фините“ нешта во животот. Оттаму, купувачите во продавници каде се пушта ваква музика (без оглед дали ним лично им се допаѓа) претпоставуваат дека производите кои се продаваат таму се скапи и „фенси“. Сепак, самото пуштање класика во продавница со кинеска пластика може да создде обратен ефект, на конфликт помеѓу нашите визуелни впечатоци и музиката.

Од друга страна, продавниците за младешка облека пуштаат современа музика со јаки басови за да асоцираат токму на тоа - на младост, најнови трендови, енергија. Но и во првиот и во вториот случај она што ја одредува атмосферата не се мелодиите туку темпото. Брзата музика прави да се движите така и низ продавницата, што е корисно кога има гужва но не и за луѓе на кои им треба повеќе време нешто да одберат. Во ресторани ваквата музика прави гостите да јадат побрзо, што пак овозможува и нивна побрза ротација. Од друга страна, побавната музика може да поттикне муштериите да нарачаат екстра парче десерт.

Генерално, јасно е дека позадинската музика влијае врз одлуките на купувачите без да го привлече нивното внимание. Според наоди на Андерсон, муштерии во продавница за вино купувале повеќе германско или француско вино во зависност од тоа дали во моментот во позадина одела германска или француска музика. Кога биле прашани за тоа дали сметаат дека музиката им влијаела врз одлуката, сите негирале.

И ова не се однесува само на купувањето по продавници. Во текст во Економнист под наслов „Пазете се од Бетовен“ се анализира ефектот на музиката и врз онлајн продажбата. СТудија со 1900 учесници симулирала онлајн шопинг со различни звуци во позадина. Резултатите до некаде се очекувани - врева од улица и бебиња што плачат ја намалувале продажбата, а звуци на птици ја зголемувале, и тоа продажбата на скари, но не и на блендери или друштвени игри.

18 декември 2018 - 10:08