Браво за Делфина!

Деновиве и кај нас се одбележуваше светскиот ден на лица со инвалидитет (хендикеп, специјални потреби, како ли беше коректното). Ние не пишуваме за пригодни настани само заради празно "одбележување", но, овојпат, имаме и тоа каков повод да споделиме со вас супер работа: автохтона домашна памет, сила и љубов создаваат андроид апликација за помош на деца на кои им треба посебна поддршка.

Апликацијата "Делфина" е Андроид апликација наменета првенствено за децата со посебни образовни потреби, децата со аутизам, за децата/учениците кои имаат пречки, отстапувања во говорно-јазичниот развој, имаат развојни и индивидуални потреби за помош и поддршка во однос на усвојувањето на буквите, броевите, боите и формите.

Зад „Делфина" стои студиото "Бест Солушн" а е производ на шеснаесетгодишното работно искуство на м-р Елена Ташкова вработена како дефектолог – логопед во ООУ „Гоце Делчев"- Штип, како и двете млади дами, Симона Андонова (10 години) и Викторија Андонова (6 години).

Раширете ја приказнава за таа да стигне до што повеќе деца, и на тој начин да им помогне во развојот на говорот и јазикот и усвојување на буквите, броевите, боите и формите како основа за когнитивниот развој на детето.

 

4 декември 2013 - 09:25