Револуција, геноцид, феминизам

Скриените политички пораки на Евровизија 2015

Колку и да изгледа така, Eвровизија е далеку од „лесна забавна програма" - деталната анализа на настапите, гласањето и сојузништвата можат да ни кажат нешто за актуелната европска геостратешка ситуација. Еве ја анализата на Гардијан за оваа година, но само преку темите и стиховите на песните.

Натпреварот за песна на Евровизија има строги правила во однос на политички содржини. „Нема да бидат дозволени стихови, говори, гестови од политичка или слична природа. Не смеат да се испраќаат пораки кои промовираат организации, институции, политичка кауза, компанија, производ или услуга. Нарушувањето на ова правило може да резултира со дисквалификација", вели едно од нив.

Па сепак, голем број песни од минатото оделе по тенката линија на оваа забрана. Грузијската "We Don't Wanna Put In" беше изведена ни помалку ни повеќе туку во Москва во 2009. Во 2012 Сан Марино ја изведе „Песната за социјалната мрежа", за сајт чие име се римува со „лук".

2015 изгледа како најполитичка до сега - како Евровизија да стана помрачна и посериозна. Ерменија, на пример, е претставена од групата Генеалогија, составена од пеачи од шест различни земји. Официјално промовирајќи мир и љубов, тие ја изведуваат песната „Соочи се со сенката", чие првично име, кое по инсистирање на организаторот мораше да се смени, беше „Не одрекувај", со очигледни асоцијации на 100-годишнината од масовното убиство на 1,5 милиони Ерменци од страна на Отоманска Турција, која до ден денес одрекува дека се работи за геноцид (заедно со пар други европски земји, и САД). Видеото се состои од семеен портрет кој полека се празни.

Романците оваа година имаат песна поврзана со децата кои се оставени во земјата од родители кои работат во странство, како и за жртвата на самите работници. Унгарците со „Војна за ништо" зборуваат за дистописки свет во хаос („Нашиот свет е ужас..никогаш не престанува"). Грчката претставничка Марија-Елена Киријаку пак наводно пее за болно раскинување, кои „експерти“ за симболизам и семиологија го толкуваат како порака до ЕУ за спас („Она што се случи не е фер, врати се и спаси ме. Ништо не остана. Имам само уште еден здив").

Освен политички пораки, песните од 2015 содржат и силни феминистички тонови - Грузија и Малта испраќаат јаки жени кои пеат песни под наслов „Воинка" или „Нескршена". Дали ова значи дека жените во Европа се подготвуваат за револуција? - прашува Гардијан.

Сепак, најинтересната забелешка е дека Британија исто така има скриена лоби-порака во нејзината песна, како подготовка за референдумот за останување во ЕУ. Песната се вика Still in Love with You (ви текнува?).

Нам пак ни е најкриво што наместо Даниел оваа година во Виена не замина Тамара. Насловот и атмосферата на нејзината песна не само што ќе ни донесеше многу сеир од Европјаните, туку можеби и некој бод плус.

Реакција на читател по објавувањето на текстот:
„Од многу фантазија ја испуштиле најочигледната поρаκа.
Финсκа.
Хаρд κоρ-панκ нумеρа по теρκ на Discharge, со стρашна поρаκа за дисκρиминација и омаловажување на лицата со хендиκеп.“

21 мај 2015 - 08:47