Преписка

Френк Лојд Рајт и куќичката за Едвард

Во јуни 1956., човекот кој постхумно го нарекоа „најголем американски архитект на сите времиња", добил необично писмо од 12-годишно момче, со молба тој својата експертиза да ја вложи во проектирање на куќа за неговиот најдобар пријател, Еди.

Џим, син на Боб Бергер, за кого Лојд Рајт шест години пред ова писмо проектирал куќа, со прилично решителен тон му пишува на славниот архитект со молба, или повеќе - со барање, тој да дизајнира куќичка за неговото куче. Секако, вели, ќе му плати.

19 јуни 1956

Почитуван г-дин Рајт,

Јас сум момче на 12 години. Се викам Џим Бегер. Вие проектиравте куќа за татко ми кој се вика Боб Бергер. Разнесувам весници со што заработувам малку и штедам во банка, а имам и нешто за трошоци.

Би ви бил благодарен доколку дизајнирате куќа за моето куче, таква која лесно се гради, и која би одела со нашата куќа. Името на моето куче е Едвард, но ние го викаме Еди. Тој има 4 кучешки, или 28 во човечки години. Тој е Лабрадор ретривер. Висок е 76 сантими, а долг еден метар. Причините зошто ја сакам оваа куќичка е заради зимите. Татко ми вели дека ако вие ја дизајнирате, тој ќе ми помогне да ја изградам. Секако ќе ви платам за плановите и материјалите од парите кои ги заработувам од весниците.

Со почит,

Џим Бергер

Архитектот одговорил со учтиво писмо дека во моментот е многу зафатен, но ако Џим му пише за неколку месеци (во ноември) тој ќе стори сè што може да му помогне. Нормално, Џим не се откажал, и повторно му пишал, потсетувајќи го на ветувањето. Пусти Френк, видел-не видел, се фатил за работа, и го изработил планот. Татко му на Џим потоа ја изградил куќичката.

 

 

Сепак, Едвард не бил импресиониран, и воопшто не сакал да живее во куќичката, ни лете ни зиме. Таа конечно била срушена во 1973. Сепак останува како историски факт дека ова е најмалиот објект кој Рајт некогаш го дизајнирал. Ав-ав за тоа!

31 октомври 2012 - 11:49