Ако му свртиме грб на црвеното месо и наместо тоа во нашата исхрана се фокусираме на ситната риба како што се сардините, инчуните или харингите, до 2050-та година би можеле да се спасуваат годишно по 750.000 човечки животи на оваа планета. Најголем аир би виделе земјите со среден или мал доход. Супер звучи, а сега малку да попазиме да не ни изгори кременадлата.

Најсеверниот регион на Норвешка побарал од Европската комисија да му даде дозвола да воведе временска зона со 26 часа, бидејќи овие 24 не вршат работа таму горе.

Застрашувачки звучи опасноста на која предупреди највисокиот американски генерал во Европа а се однесува на реалниот ризик без разлика на вистинските намери, несакајќи и случајно да изгориме во нова светска војна. Порано постоеа жешки линии, црвени телефони и суптилен вокабулар за читање и толкување на намерите на спротивната страна. Сега од тоа нема ништо. 

Само компанијата Скајдио испрати стотици од своите најдобри дронови во Украина за да ја помогне војната против Русија. Дроновите не помогнаа во ништо, а најголемиот дел од нив паднаа жртви на руските оружја за електронско војување. Истото се случи и со дроновите од други американски компании.

Два месеца откако воведоа нови правила за користење на мобилни во англиските училишта, британските власти сега се на памет да ја забранат продажбата на смартфони на лица помлади од 16 години на ист начин како што е забранета продажба на алкохол или цигари.

По којзнае кој пат, фармацевтскиот гигант Фајзер е обвинет дека злоупотребувал социјални мрежи за со невистините и заведувачки тврдења да ја промовира својата вакцина. За жал, колку и обвинувањата и пресудите да стануваат сè посериозни, казните и последиците за Фајзер и неговите функционари стануваат сè посмешни. 

Градските власти сакаат за сите локални супер/мини-маркети и продавници да воведат задолжителен рок од шест месеци најава пред да го затворат својот локал во Сан Франциско.

Пристигнувањето на американските Ф-16-ки ќе биде нерелевантно ако украинската војска е прегазена од руската заради немање доволно артилериска муниција, порачува висок украински офицер.

Наместо напади на најголемите и најзначајните енергетски капацитети на Украина, Русија по ново се фокусира на уништување на помалите електрани во региони кои се послабо бранети од Киев. И за сега тоа им дава одлични резултати.

Со огромна грижа на совест и морални дилеми, израелски доктор им пиша на властите дека се принудени да учествуваат во сериозно кршење на меѓународните правила. За што станува збор? За тоа што палестински заробеници толку долго се држат со окови на нозе и лисици на раце што на докторите потоа не им останува ништо друго освен да им ампутираат екстремитети. 

Со работите какви што на денешен ден се на фронтот во Украина и на дипломатскиот фронт низ светот, опциите на Зеленски се меѓу лошо и бетер, пишува Вашингтон пост.

Чеченскиот министер за култура објави забрана за сите музички, вокални или кореографски дела кои нема да бидат во темпото на традиционалната чеченска музика и вкусот на чеченскиот темперамент. Седнале со Кадиров и со метроном и премудро решиле дека една песна не треба да биде ни брза ни бавна туку -  таман. Следува БПМ спецификација.

Жената, инаку физички прописно здрава, легално ќе си го одземе животот затоа што не може да издржи да продолжи да живее со комбинација од депресија, аутизам и гранично нарушување на личноста.

Сведувајќи го само на фаза во развојот, холандска студија спроведувана во период од 15 години открива дека најголемиот дел од испитаниците кои на 11-годишна возраст изјавиле дека сметаат дека се родени во погрешен род, со тек на време се предомислуваат.

Анализа на „отпечатокот на нееднаквост“ на повеќе од 200 американски корпорации покажува дека 90% од профитите (1.100 милијарди од 1.250 милијарди) завршуваат кај најголемите акционери, а и ЦЕО-та не минуваат лошо.

Не само што лажните Армани ги шијат Кинези туку и оригиналите ги шијат Кинези, живеејќи и работејќи во супстандардни услови во околината на Милано, некои од нив комплетни илегалци во земјата. За чанта која Армани ја продавал за 1.800 евра, на кинескиот подизведувач му биле давани 90-тина евра а не се знае колку од тоа завршиле кај работниците.

Еуропол идентификувала 821 криминална мрежа кои функционираат во Европа бавејќи се со широко портфолио илегални ативности. Шверцот и трговијата со дрога е главната игра а бизнисот е фокусиран во неколку европски земји. Многу криминални групи ја маскираат нивната основна работа со легални бизниси а најпопуларен начин за перење пари се недвижнините.

Урсула фон дер Лајен си стави трн во здрава нога ангажирајќи човек од нејзината партија како советник, за дебела ЕУ плата. Таа само што ја почнува кампањата за реизбор како прв човек на Европската комисија кога се дозна случајот кој ја прави спорна нејзината кандидатура. Проблем е што Борел и други големи фаци во ЕУ отворено ѝ пишаа: Добро, ние глупи сме?

Образложувајќи дека ако Русија во 2022 не искористи нуклеарно оружје, нема ни сега да искористи се додека не е под закана од истото, аналитичарот Едвард Лутвак му предлага на НАТО да испрати свои војници во Украина за да му помогне на Киев.

Според истражувања на Нилсен, преку 80 проценти од попустите не се профитабилни, дури ни краткорочно.  А краткорочното задоволство е главната придобивка заради која се прибегнува кон попусти и промоции. Се добива поголем волумен на продажба ама потоа се паѓа, па по некое време, од немај каде се прибегнува кон нова доза. Исто како со дрогите.

Мариупол беше целосно уништен од Русија, а  илјадници цивили загинаа и беа раселени. Сега обновата на градот, која не запира, е една од клучните точки на руската пропаганда, а германските компании се таму да помогнат, објавува германската телевизија АРД во текст под наслов „Помошниците на Путин“.

Лавандер, систем базиран на вештачка интелигенција развиен за војување, обележал 37.000 Палестинци како осомничени оперативци на Хамас, од кои дел без никаква дополнителна човечка проверка потоа биле бомбардирани, објавуваат израелски медиуми.

Вината за зголемените емисии на озлогласениот јаглерод диоксид често се препишува на сите нас кои ја уништуваме „мајкичка Земјичка“, до толку што уште малку ќе не фати грижа на совест што воопшто дишеме па издишуваме CO2. Неодамна излезе отрезнувачки извештај за фактичката состојба на планетава: не сме сите криви туку огромно мнозинство од емисиите водат до само 57 компании и држави во светот.

Изгледаше нестварно добро концептот кој Амазон го промовираше пред осум години по кој влегуваш во продавница, земаш што ти треба и излегуваш, без редови, без каса, без наплата. Иако изгледаше комплетно автоматизирано, во суштина армија Индијци ги гледаа снимките од продавницата и ви ја правеа сметката. Сега ни Индијци не им требаат.