Утре пред ГТЦ за секого по нешто!

Бесплатни прегледи за домашни миленици, ликовна едукација за најмладите и дружење на корисници на Инстаграм.

Во сабота попладне, граѓанската иницијатива „Го сакам ГТЦ" на Скопјани ќе им понуди богата програма исполнета со забава, дружење, но и со содржини од информативен и едукативен карактер.

Имено, в сабота, под мотото „Милениците го сакаат ГТЦ", сите сопственици на домашни миленичиња ќе имаат можност да добијат бесплатни прегледи и консултации со професионални ветеринари и кинолози. Се' што треба да направат е да дојдат заедно со своите миленици во паркот Жена – Борец во 13:00 часот попладне кога започнуваат бесплатните прегледи и консултации.

Истовремено во паркот ќе се одржи и настанот „Најмладите творат за ГТЦ" каде под менторство на ликовните уметници Ѓорѓе Јовановиќ, Инес Ефремова и Дороти Поцкова, најмладите ќе имаат можност да цртаат и да ја покажат својата креативност. За нив ќе бидат обезбедени хамери и боички со што ќе можат да се дружат и забавуваат истовремено запознавајќи се со тајните на ликовната уметност.

Со почеток во 14:00 часот пак, кружните скали кај ГТЦ ќе бидат збирно место за сите „инстаграмџии" кои низ заедничко дружење ќе ја истакнуваат својата креативност изразена преку фотографии и видеа посветени на Градскиот Трговски Центар.

Сите овие настани се од отворен карактер па затоа, иницијативата „Го сакам ГТЦ" ги повикува сите граѓани да дојдат во паркот Жена – Борец и да уживаат во богатата програма.

Овие настани се дел од кампањата „Излези за ГТЦ" која има цел да ги мотивира граѓаните во Општина Центар да излезат на претстојниот референдум кој ќе се одржи на 26-ти Април и на кој граѓаните на Општина Центар ќе одлучуваат за изгледот на ГТЦ.

 

17 април 2015 - 13:50