Америчка пита со шумско овошје

Се топи во уста!

Потребни состојки:

  • брашно 300 г
  • путер 250 г
  • сол
  • вода 
  • шеќер 200 г
  • микс шумско овошје 400 г
  • цимет 
  • скроб 40 г
  • лимон

Од другарките за роденден добив електрична вага. Многу ѝ се израдував и решив веднаш да ја употребам. Многу ми беше жал на крај на готвењето како изгледаше, целата испофаќана со брашно, леплива, ама ја средив и сега е пак како нова. Ај тоа, него како бе така не даваат батерии заедно со вагата! Нели купуваш телевизор и во кутијата го наоѓаш далечинското во ќесичка со две батерии. Пошто си го реков ова истото во моментот кога видов дека нема батерии, ми текна и да ги извадам од далечинското (многу ми доаѓа да си го напишам даљинско, ама ај). 

Паралелно правев два рецепта. Едниот е овој што денес го читате, а другиот е тесто за пица (за неколку дена ќе ви го пуштам). Дали може да си замислите како изгледаше кујната?! 

Бидејќи имам и нова тава за вакви рецепти, а и отсекогаш сум имала желба да направам америчка пита, онаква со ленти одозгора. Ќе ви кажам дека тестото е мнооогу добро, а филот можете да го правите со кое било овошје. Јас одбрав микс на шумско овошје и плус за одозгора топка сладолед од ванила. Многу нешто ми затопли времево, па да се освежам. Хехе!

Значи, рецептот 👇👇👇

Чекори за подготовка:

  1. Прво ќе го направиме тестото. Во длабок сад ставете го брашното и една лажичка сол. Измешајте убаво за да се распореди солта насекаде. Додадете 220 г од путерот (мора да биде од фрижидер), но претходно пресечете го на мали коцки.

  2. Со врвовите на прстите, а не со цела дланка (за што помалку да го стопите путерот со вашата температура), полека почнувајте да ги спојувате путерот и брашното. Треба да добиете една смеса што наликува на трошки.

  3. Додадете 90 мл вода. Ќе заборавев, водата мора да биде многу ладна. Ако имате во фрижидер, од таа да земете. Почнете да ја месите смесата. Така едно 3-4 минути. Ќе добиете убаво тесто. Оставете го да одмори 15 минути.

  4. Додека одмора тестото, ќе го направите филот. Во тенџерче измешајте ги шеќерот, скробот, прстофат сол, цимет и 80 мл вода. Промешајте со рачна маталка додека не се изедначи смесата. Измерете 100 г од миксот на боровница, брусница и аронија. Сакав да ги одвојам само боровинките, ама ме мрзеше да требам, па ја употребив мешавината таква како што е. (Морав и слика од новата вага).

  5. Ставете ги во смесата што ја направивте во тенџерчето.

  6. Ставете го на рингла и мешајте додека не почне да врие. Откако ќе зоврие, мешајте уште 2-3 минути, додека не забележите како полека добива една мала густина. Тргнете го да се подолади малку. Измерете по 150 грама од другите овошја. Јас одбрав малина и јагода.

  7. Јагодите пресечете ги на пола и заедно со малините ставете ги во смесата со брусница и промешајте.

  8. Се враќаме на тестото, сосот нека си седи. Размесете го уште 3-4 минути. Поделете го на две топки, од кои едната да биде малце поголема.

  9. Направете дискови од истите и завиткајте ги во стреч фолија. Нека седат во фрижидер 1 час. Во меѓувреме, направете си кафе и запалете си цигарче (ако не сте пушач, направете си само кафе) :).

  10. Ок, помина еден час. Наросете брашно на рамна површина и расукајте ги тестата. Првото, поголемото, расукајте го и ставете го во тава.

  11. Ставете го филот, ставете го остатокот од путерот, или 30 г, пресечен на коцкички. Краевите со нож исечете ги, но оставете 1-2 сантиметри.

  12. Размесете го другото тесто и пресечете го на ленти дебели 1-1,5 сантиметар.

  13. Лента по лента ставајте ги постепено и плетете ги.

  14. Подолгите ленти слободно скратете ги и покријте ги со краевите на долното тесто. Печете во веќе загреана рерна 10 минути на 200 степени и уште 45 минути на 180 степени.

  15. Извадете ја решетката од рерната и ставете ја онаму каде што ќе ви се лади питата. Врз неа ставете ја питата и чекајте нека се олади. Извадете едно парче, наросете со шеќер во прав, малку цимет и одозгора ставете топка сладолед од ванила. Мњам!

Хинт:

Супер би било ако полнежот го направите од јаболка, стапче ванила и цимет! Мммм...
2 февруари 2017 - 17:23