Арсен и жива за вас прекрасни безглутенски луѓе

Прво да кажеме дека станува збор за мала студија, второ да кажеме дека во неа истражувачите имаат откриено дека безглутенската храна содржи зголемени нивоа на отровни метали.

Не само што научниците уште ја немаат потврдено корисноста на безглутенската исхрана за тие што се без медицински проблеми, туку најдоа и проблеми ако сам си пропишуваш ваква диета.

Во анализа на примероците крв и урина од луѓе што се на безглутенска исхрана, научниците откриваат покачени нивоа на арсен и жива. Едно од објаснувањата е дека токму ова се двете токсични супстанции што се појавуваат кај исхрана богата со ориз, храна што е природно безглутенска и која се користи како замена за најразлични глутенски состојки во храната.

До сега се знае дека изложеност на високи нивоа на жива и арсен се поврзува со ризик од кардиоваскуларни болести, ракови и невролошки проблеми.

Од Арс техника повторуваат дека студијата е многу мала, и не е јасно дали повишените нивоа се директно поврзани со исхраната на учесниците (која не била лабораториски следена), и дали тие се доволно високи за да предизвикаат сериозни здравствени проблеми.

„Овие резултати индицираат дека може да има непланирани последици од безглутенската исхрана. Меѓутоа невозможно е да се изведат коректни заклучоци сè додека не се спроведат дополнителни студии за да се утврдат здравствените последици поврзани со повисоки нивоа на изложеност на арсеник и жива од безглутенската исхрана“, објаснува епидемиологот од Универзитетот Илиноис, Марија Аргос.

Едно гледиште на темата:

 

15 февруари 2017 - 13:00