МЗТ Скопје го забележа петтиот пораз и вкупно четврти на гостувањата оваа сезона во АБА лигата. Овој пат тие загубија со 72:70 на гостувањето кај Задар, на натпревар во кој домаќинот ја имаше контролата во текот на целиот натпревар, а нашиот шампион предоцна се разбуди.
На полувремето Задар имаше предност од 13 поени (44:31), а во последната четвртина влегоа со водство од +14.
Дури во тие моменти кошаркарите на МЗТ се активираа и со голема серија ја анулираа негативата.
На шест секунди до крајот Костоски не реализираше слободно фрлање за израмнување, а со звукот на сирената го промаши и шутот кој ќе донесеше продолжение.
Чековски, Стојановски, Костоски и Синовец постигнаа по 11 поени, а кај Задар најефикасни беа Рамљак со 15 и Шутало со 14 поени.
